Árbir qazaqstandyqqa kúnine 7 sıgaretten keledi - bul óte qaýipti jaǵdaı
ASTANA. Sáýirdiń 14-i. QazAqparat /Arman Asqarov/ - Esep boıynsha, elimizde temeki shegetin jáne shekpeıtin azamattardyń barlyǵyn alǵan kezde, olardyń árbireýine kúnine 7 sıgaretten keledi.
Bul týraly búgin Astanada ótken baspasóz máslıhatynda «Temeki tútininen aırylǵan Qazaqstan» ulttyq koalıtsııasynyń dırektory Jámılá Sadyqova málim etti, dep habarlaıdy QazAqparat.
Uıym jetekshisi atap kórsetkendeı, búgingi tańda Qazaqstanda 4,2 mln. azamat temeki shegedi. Al sońǵy 10 jyldyń ishinde sol azamattardyń temekini tutyný kólemi 4 esege ulǵaıdy. «Máselen, 1998 jyly elimizde temeki shegetin árbir azamat jylyna 666 dana temeki tartsa, bir jyldan keıin bul kórsetikish eki ese ósip, 1305 dana temekige deıin jetti. Búgin bolsa, árbir shegetin adam jylyna 3000 temekini tartyp tastaıdy. Bul degenimiz, shegetin jáne shekpeıtin árbir qazaqstandyq azamat kúnine 7,2 sıgaretten tartady degen sóz. Bul óte qaýipti jaǵdaı», - deıdi J.Sadyqova.
