Árbir qazaqstandyq týǵan elin qorǵaýǵa daıyn bolýy kerek - Gúlshara Ábdiqalyqova
Qorǵanys mınıstrligi uıymdastyrǵan is-sharaǵa Qaraǵandy oblysynyń ákimi E.Qoshanov, Parlament depýtattary, Qazaqstan Qarýly Kúshteriniń ardagerleri, «Jas sarbaz» áskerı-patrıottyq qoǵamdyq qozǵalysy respýblıkalyq shtabynyń músheleri, memlekettik organdar, qoǵamdyq birlestikter ókilderi, áskerı-patrıottyq klýbtardyń, respýblıkalyq «Jas Ulan» mektebiniń jáne oblystardaǵy áskerı mektep-ınternattardyń 600-den astam tárbıelenýshisi qatysty.
G.Ábdiqalyqova Nursultan Nazarbaevtyń: «Memleket árdaıym óz qaýipsizdigin jáne shekarasynyń beriktigin oılaýǵa tıis» degen sózine nazar aýdardy.
«Sondyqtan, árbir qazaqstandyq árdaıym jaýapty ári mártebeli mıssııaǵa - týǵan elin, Qazaqstanymyzdy qorǵaýǵa daıyn bolýy kerek dep sanaımyn. Bul - kez kelgen azamattyń qasterli boryshy ǵana emes, eń aldymen, Otan qorǵaý jolynda máńgilik dańqqa, halyq súıispenshiligine bólengen babalarǵa, ákelerimiz ben atalarymyzǵa degen taǵzym men qurmettiń belgisi», - dedi Memlekettik hatshy.
Ashylý rásiminde Qazaqstan Respýblıkasy Qarýly Kúshteriniń bólimsheleri jas patrıottarǵa áskerı ónerdiń qımyl-áreketterin kórsetti.
Qarýly Kúshter quramyna kiretin ásker túrleri ókilderiniń jıynǵa qatysýshylarmen «Uly dala áskeri - «Máńgilik El» tiregi!» atty taqyryptaǵy ınteraktıvti kezdesýi, sonymen qatar, «Aıbyn daryny» zııatkerlik oıyny, robot tehnıkasy boıynsha «Meniń robotym» konkýrsy, alaý túbinde «Aıbyn jalyny» atty qyzyqty kesh, sporttyń áskerı-qoldanbaly túrlerinen jáne jaýyngerlik daıyndyq pánderinen kóptegen saıystar uıymdastyryldy.
Tárbıelenýshiler «Aıbyn» respýblıkalyq áskerı-patrıottyq jastar jıyny aıasynda áskerı daıyndyq mektebinen ótip, áskerı tehnıkanyń jáne Qazaqstan áskerindegi qarý-jaraqtyń zamanaýı úlgilerimen tanysty.
Sońynda Memlekettik hatshy jıynǵa qatysýshylarǵa saıystardyń jaqsy ótýine, árdaıym rýh sergektigi men erik-jigerlerin kórsetýine, eshqashan jeńisten úmit úzbeı, Qazaqstannyń naǵyz patrıottary bolýyna nıettestigin bildirip, tolaǵaı tabys tiledi.
