Árbir qazaqstandyq qorshaǵan ortaǵa degen jaýapkershiligin sezinýi tıis - Máýlen Áshimbaev
«Búgin - halyqaralyq tazalyq kúni. Osynaý úlken halyqaralyq bastamany memlekettik emes uıymdar kóterip, sońǵy 10 jyldan astam ýaqyt boıy búkil álemde qyrkúıek aıynyń ishinde osyndaı sharalar ótýde. Mysaly, ótken jyly halyqaralyq tazalyq kúnine 180 memlekette 20 mln-nan astam adam qatysqan. Búgin Ekologııa mınıstrliginiń jáne elorda ákimdiginiń bastamasymen osyndaı jaqsy shara ótip jatyr. Bir jaǵynan turmystyq qatty qalyqtardan saıabaqtarymyzdy, kóshelerimizdi tazartsaq, ekinshi jaǵynan aǵash otyrǵyzýdamyz. Bul quptarlyq bastama. Jalpy, qorshaǵan ortany qorǵaý bizdiń basty basymdyqtarymyzdyń biri. Prezıdentimiz Joldaýynda da osy máselege úlken kóńil bólgenin bilesizder», - dedi Senat tóraǵasy «World clean up day» – «Búkilálemdik tazalyq kúni» aktsııasy barysynda.
Osy rette Máýlen Áshimbaev Memleket basshysy jyldyń sońyna deıin jańa Ekologııalyq kodeks qabyldaýdy tapsyrǵanyn, onda atalǵan saladaǵy problemalardy sheshýge qatysty sharalar qamtylatynyn atap ótti. Prezıdentimizdiń bastamasymen ormandarymyzda 2 mlrd-qa jýyq, qalalarda 15 mln aǵash otyrǵyzylatyndyǵyn eske saldy.
«Bul úlken bastama. Al búgin osynaý úlken bastamanyń tusaýkeseri elordamyzda ótip jatyr desek, artyq aıtqandyq emes. Jalpy, aldaǵy ýaqytta osy baǵytta kóp jumys atqarýymyz kerek. Zańdar da qabyldanýy tıis. Osy baǵyttaǵy jumysty depýtattar da jalǵastyrady. Qorshaǵan ortany qorǵaý tek memlekettik organdardyń maqsaty men mindeti emes. Óıtkeni, qoǵam men memlekettik organdardyń jumysyn biriktirgende ǵana jumys nátıjeli bolady. Sondyqtan árbir qazaqstandyq qorshaǵan ortaǵa degen jaýapkershiligin sezinýi tıis. Tabıǵat baılyǵyn qorǵaý, aıalaý, tabıǵatqa degen durys kózqaras ata-babamyzǵa tán qasıet. Qazaq halqy ejelden tabıǵatpen úlesimdi tirshilik etken», - dedi Senat spıkeri.
Aıta keteıik, sharaǵa QR Ekologııa, geologııa jáne tabıǵı resýrstar mınıstri Maǵzum Myrzaǵalıev, elorda ákimi Altaı Kólginov, QR Parlamenti Senaty men Májilisiniń depýtattary, eriktiler, memlekettik qyzmetshiler jáne qala turǵyndary qatysyp jatyr.
