Árbir fermer bólinetin qarajattyń ıgiligin kórýi tıis - Premer
Úkimet basshysy organıkalyq jáne mıneraldy tyńaıtqyshtardy paıdalana otyryp, astyq óndirýdiń jańa tehnologııalaryna kóshken «Namys Group» JShS sharýa qojalyǵyna bardy.
Óńir basshysy Ermek Marjyqpaevtyń agroónerkásiptik keshendi damytý týraly baıandamasyn tyńdaǵan Álıhan Smaıylov búgingi tańda Aqmola oblysynyń aldynda turǵan basym mindetterdiń biri - egis naýqanyn sapaly júrgizip, ýaqytyly aıaqtaý ekenin atap ótti. Qazirgi ýaqytta elimizdiń barlyq óńirine arzandatylǵan dızel otyny jetkizilip jatyr. Tuqym jáne mıneraldy tyńaıtqyshtarmen 100%-ǵa qamtylǵan.
Kóktemgi egis jumystaryn júrgizý úshin aýyl sharýashylyǵy taýaryn óndirýshilerge jeńildetilgen nesıe berildi, onyń kólemi 70 mlrd teńgeden 140 mlrd teńgege deıin ulǵaıtyldy. «Azyq-túlik kelisim shart korporatsııasy» UK» AQ-tyń forvardtyq satyp alý baǵdarlamasy 2 esege ulǵaıtylyp, 80 mlrd teńgege deıin jetkizildi. Sonymen qatar, mal azyǵy qoryn qalyptastyrý úshin forvardtyq satyp alýǵa 20 mlrd teńge bólindi.
«Eń birinshi mindet – bólingen qarajattyń árbir fermerge deıin jetýin qadaǵalap, kóktemgi egis jumystary kezinde týyndaıtyn problemalardy dereý sheship otyrý», - dedi Álıhan Smaıylov.
Sonymen qatar, Premer-Mınıstr oblystaǵy birqatar aýyl sharýashylyǵy qurylymdarynyń basshylarymen kezdesý ótkizdi. Olardyń ishinde «Agrofırma TNK», «Rodına» agrofırmasy», «Prııshıme», «Zarechnoe», «Eńbek», «Sandyqtaý» jáne basqa seriktestikter bar.
Premer-Mınıstr sharýalar kótergen máselelerdi muqııat tyńdap, ýákiletti memlekettik organdarǵa olardy sheshý joldaryn pysyqtaýdy tapsyrdy.
Sondaı-aq, Úkimet basshysy óńirdegi «Qazaqstandyq Agro Innovatsııalyq Korporatsııa» JShS-ǵa bardy. Kásiporyn Reseı jáne Belarýs óndirýshilerimen birge suranysqa ıe aýyl sharýashylyǵy jáne kommýnaldyq tehnıkany qurastyrýmen aınalysady.
Álıhan Smaıylov búginde qazaqstandyq kompanııalardyń jappaı aýyl sharýashylyǵy tehnıkasyn shyǵarýdy ıgergenin atap ótti. Máselen, naryqtaǵy otandyq traktorlar men kombaındardyń úlesi – 90%. Sonymen qatar, aýyl sharýashylyǵy mashınasyn jasaý boıynsha jergilikti qamtý - jalpy alǵanda shamamen 40%. Osy oraıda, Premer-Mınıstr aýyl sharýashylyǵy tehnıkasy ónimderimen jergilikti qamtý úlesin odan ári arttyrý qajettigin atap ótti.
Úkimet basshysynyń jumys saparyndaǵy kelesi nysan John Deere agrotehnıkasyna qyzmet kórsetetin TMD-daǵy iri ortalyq «Eurasia Group Kazakhstan» JShS boldy.
Álıhan Smaıylov joǵary tehnologııalyq aýyl sharýashylyǵy tehnıkasyn paıdalaný eńbek ónimdiligin arttyrýda mańyzdy element ekenin eske saldy.
Bul maqsatta Úkimet mashına-traktor parkin ınvestıtsııalyq sýbsıdııalaý, nesıeler men lızıng boıynsha syıaqy mólsherlemesin sýbsıdııalaý arqyly jańartyp jatyr. Sondaı-aq, «Báıterek» UBH» AQ qarjy ınstıtýttary arqyly jeńildikpen nesıe berý (6-7% jyldyq mólsherleme) baǵdarlamasy iske asyrylyp jatyr.
«Atalǵan sharalardyń arqasynda aýyl sharýashylyǵy tehnıkasy parkin jańartý deńgeıi qarqyn alyp keledi. Mundaǵy mańyzdy másele - óndiristi lokalızatsııalaý bolyp otyr», - dedi Álıhan Smaıylov.
Budan keıin Premer-Mınıstr et, shujyq ónimderi, konserviler men jartylaı fabrıkattar óndiretin «Bıjan» et óńdeý keshenine bardy.
Álıhan Smaıylov memlekettiń keshendi qoldaý sharalaryn iske asyra otyryp, aýyl sharýashylyǵy ónimderin qaıta óńdeýge erekshe nazar aýdaratynyn atap ótti.
«Importty azaıtyp, ishki suranysty tolyǵymen jabý úshin otandyq ónimderdiń óndirisin ulǵaıtýymyz kerek. Ákimdik fermerlermen jumys júrgizip, sýbsıdııalaý kezinde qarsy mindettemeler qoıyp, et óńdeý kásiporyndarynyń júktemesin qamtamasyz etýge jaǵdaı jasaýy kerek», - dedi Álıhan Smaıylov.
