Árbir etnomádenı birlestikte memlekettik saıasatqa belsendi aralasyp kete alatyn jas kóshbasshylardy tárbıeleý kerek - Á.Raqymjanov
ASTANA. Jeltoqsannyń 22-si. QazAqparat /Gúlmıra Álıakparova/ - Qazirden bastap árbir etnomádenı birlestikte memlekettik saıasatqa belsendi aralasyp kete alatyn jas kóshbasshylardy tárbıeleý kerek.
Bul pikirin búgin Astana qalasy Qazaqstan halqy Assambleıasynyń HІ sessııasy barysynda elorda ákiminiń orynbasary Ámirhan Raqymjanov bildirdi, dep habarlaıdy QazAqparat.
«Qazirden bastap árbir etnomádenı birlestikte Astananyń ekonomıkalyq áleýeti men etnosaralyq jáne konfessııaaralyq kelisimdi damytýǵa, barsha qazaqstandyqtardyń ál-aýqatyn arttyrýǵa baǵyttalǵan - memlekettik saıasatqa belsendi aralasyp kete alatyn jas kóshbasshylardy tárbıeleý kerek. Bul ońaı jumys emes ekendigi túsinikti. Sondyqtan qalalyq bılik onyń tıimdi sheshilýi úshin qajetti barlyq kómekti kórsetýge ázir», - dep atap ótti ol, sessııaǵa jınalǵan Assambleıa múshelerine qaratyp aıtqan sózinde.
Sondaı-aq Á.Raqymjanov búginde Astana qalasy ákimdiginiń qaraýyna ótip jatqan Beıbitshilik jáne kelisim saraıynan respýblıkalyq ortalyqtarmen tyǵyz jumys jasap otyrǵan etnomádenı birlestikterge 12 keńse beriletinin atap ótti.
«Daǵdarys ýaqytynda tek óziniń ǵana jaǵdaıyn oılamaý qajettigin árqaısyńyz jiti túsinip otyrǵandaryńyzǵa senimdimin. El men qalamyz sizderdiń, eń aldymen - shyǵarmashylyq kúsh-jigerlerińizdi qajet etedi», dedi ol.
