Árbir eksporttaýshy 1 tonna astyq tasymaldaǵany úshin bıýdjetten qosymsha 20 AQSh dollaryn alady - S.Qulambaev
ASTANA. Jeltoqsannyń 25-i. QazAqparat /Marlan Jıembaı/ - Reseı aýmaǵy arqyly tasymaldaý shyǵyndaryna járdemaqy tóleý boıynsha «Qazaqstan temir joly» UK» AQ men «Reseı temir joldary» arasyndaǵy kelisimder sheńberinde árbir eksporttaýshy 1 tonna astyq tasymaldaǵany úshin bıýdjetten qosymsha 20 AQSh dollaryn alady.
Bul týraly búgin «Azyq-túlik kelisimshart korporatsııasy» AQ basqarmasy tóraǵasynyń orynbasary Serik Qulambaev atalǵan vedomstvoda ótken selektorlyq keńesten keıin jýrnalıstermen bolǵan suhbat barysynda aıtty.
Onyń aıtýynsha, osydan keıin astyqty eksporttaý máselesi birshama ónimdi bolmaq. Jalpy 2-3 mıllıon tonna astyq eksporttaý josparlanyp otyr.
«Negizinen astyq Ortalyq Azııa elderine eksporttalady. Búgingi kúni Qytaı arqyly Tynyq muhıty basseındegi elderge astyq jetkizý máselesi de talqylanýda. Sonymen qatar Qytaıǵa 3 mıllıon tonnaǵa deıin astyq eksporttaý máselesi qarastyrylýda», dedi óz sózinde basqarma tóraǵasynyń orynbasary.
S.Qulambaevtyń sózine qaraǵanda, qazirgi ýaqytta Qytaımen Qazaqstan astyǵyna kvota ashý máselesine qatysty kelissózder júrgizilýde. Kórshi elde joǵaryda keltirilgen astyq kólemin bóletin «Kofka» korporatsııasy jumys isteıdi.
Eksporttalatyn astyqtyń 1 tonnasy 18500 teńgeni qurap, oǵan saqtaý quny men «Azyq-túlik kelisimshart korporatsııasynyń» 3 paıyzdyq ústemesi qosylady.
