Árbir besinshi sý qoımasy tehnıkalyq turǵysynan qanaǵattanarlyqsyz jaǵdaıda tur - QR Aýyl sharýashylyǵy mınıstrliginiń sarapshysy J.Muhatov
ASTANA. Qazannyń 19-y. QazAqparat /Muratbek Maqulbekov/ - Árbir besinshi sý qoımasy tehnıkalyq turǵysynan qanaǵattanarlyqsyz jaǵdaıda tur.
Bul týraly «Qazaqstan Respýblıkasyndaǵy gıdrotehnıkalyq ǵımarattardy qaýipsizdikpen qamtamasyz etý» taqyrybynda ótken ulttyq keńes barysynda QR Aýyl sharýashylyǵy mınıstrligi Sý resýrstary komıtetiniń bas sarapshysy Jumabek Muhatov málim etti.
«Mınıstrlik oblystyq ákimdiktermen, Tótenshe jaǵdaılar jónindegi mınıstrlik jáne basqa da múddeli vedomstvolarmen birge sý sharýashylyǵy nysandaryna tehnıkalyq zertteý júrgizdi», - dedi J.Muhatov.
Onyń aıtýynsha, bógetter men sý qoımalardyń qaýipsizdik jaǵdaıyna júrgizilgen tekserý nátıjeleri árbir besinshi sý qoımanyń qanaǵattanarlyqsyz jaǵdaıda turǵandyǵyn kórsetken.
J.Muhatov gıdrotehnıkalyq ǵımarattar men gıdromelıoratsııa júıeleriniń apatty aýmaqtaryn qalpyna keltirý, qaıta qurastyrý men paıdalanýǵa berý úshin respýblıkalyq bıýdjetten bólinetin jyl saıynǵy 3.5-15 mıllıard teńge jetkizilkisiz ekenin atap ótti. Sýlandyrý júıelerin qaıta qurastyrý men qalpyna keltirýge arnalǵan sharalar úshin 2010-2020 jyldar aralyǵynda elimizge 300 mıllıard teńgeden astam qarajat qajet.
Sarapshy tek memlekettik sý sharýashylyǵy nysandaryn ǵana qaıta qurastyrýdan ótkizý úshin 52,7 mıllıardqa jýyq teńge qajet bolatyndyǵyna toqtaldy.
