Árbir besinshi adam jumys ornynda zorlyqqa ushyraıdy - BUU

ASTANA. QazAqparat - Árbir besinshi jumysshy jumys ornynda fızıkalyq, psıhologııalyq nemese jynystyq zorlyqqa nemese alymsaqtyqqa ushyraıdy. Ásirese bosqyn áıelder zardap shegýde. Bul týraly Halyqaralyq eńbek uıymynyń (HEU) jańa baıandamasynda aıtylǵan, dep habarlaıdy QazAqparat BUU Jańalyqtar qyzmetine silteme jasap.

Onyń avtorlary máseleniń aýqymy úlken ekenin jáne munyń jumysshylardyń moraldyq jaǵdaıy men densaýlyǵyna, eńbek atmosferasyna, óndiriske jáne qoǵamdy damytýǵa zııany kóp ekenin atap ótti. Zorlyq pen alymsaqtyq barlyq eńbek salasynda jáne álemdegi barlyq ekonomıkalyq qyzmet salasynda, sonyń ishinde jeke jáne memlekettik sektor, formaldy jáne beıformaldy ekonomıkada bolyp jatyr. HEU qoldaýymen zertteý júrgizilip, onyń aıasynda bes jumysshynyń biri – barlyq jumys kúshiniń 23 protsenti jumys ornynda zorlyqqa nemese alymsaqtyqqa ushyraǵany anyqtaldy. Kóptegen adamdar ony aıtýǵa uıalady, ózin kináli sezinedi, basshylyqqa senbeıdi, nemese bolǵan jaǵdaıdy olardyń jumys ornyndaǵy qalypty jaǵdaı dep esepteıdi.

Baıandama deregine sáıkes, saýalnamaǵa qatysqan jumys isteıtin erler men áıelderdiń 17,9 protsenti psıhologııalyq zorlyqqa jáne alymsaqtyqqa ushyraǵanyn málim etti. 8,5 protsenti fızıkalyq zorlyqty bastan ótkergen. 6,3 protsenti jynystyq zorlyq pen jynystyq alymsaqtyqqa ushyraǵanyn habarlady. Olardyń basym bóligi áıelder. Baıandama avtorlary atap ótkendeı, jas áıelder erkekterge qaraǵanda jynystyq zorlyq-zombylyq pen jynystyq alymsaqtyqqa eki ese, al mıgrant áıelder basqa áıelderge qaraǵanda eki ese jıi ushyraıdy. Kóptegen adam jumysta ózderine degen ádepsiz qatynasqa birneshe ret tap bolǵany aıtyldy.

Foto: aa.com.tr