Árbir balaǵa 21 myń teńge tóleý úshin zańnamaǵa ózgeris engizý kerek - depýtat Áltaev
«Bul - óte mańyzdy, óte kerek nárse. Óıtkeni men anaý kúnderi de aıtyp júrdim, qazirgi áleýmettik kómek, ásirese, kópbalaly otbasylarǵa beriletin járdemaqy jetkiliksiz. Endi, Elbasy óte keremet bir tapsyrmany berdi. Jaǵdaıy tómen kópbalaly otbasylarda árbir balaǵa 21 myń teńgeden aı saıyn tólenetin boldy. Ondaı kómek tórt jáne odan kóp balasy bar otbasylarǵa beriledi», - dedi N.Áltaev QazAqparat tilshisine bergen suhbatynda.
Depýtattyń aıtýynsha, atalǵan tapsyrma tez arada oryndalýy tıis. Ol úshin tıisti zańnamaǵa ózgeristerdi engizý kerek. «Men oılaımyn, Úkimet tez arada zańnamalarǵa ózgeris engizedi de, jaqyn arada atalǵan tólemder berile bastaıdy. Óıtkeni Prezıdenttiń ózi aıtty, osy jyldan bastap tóleý kerek. Elbasynyń tapsyrmasy bolǵannan keıin ony tez arada iske asyratyn bolady», - dep atap kórsetti N.Áltaev.
Aıta keteıik, keshe «Nur Otan» partııasynyń XVIII sezinde Memleket basshysy Nursultan Nazarbaev kópbalaly otbasylarda árbir balanyń tólemaqysyn 21 myń teńgege deıin arttyrýdy tapsyrdy. «Úkimetke áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeıtýdi tapsyramyn. Atalǵan kórsetkishti kúnkóris deńgeıiniń 70 paıyzyna deıin jetkizýimiz kerek. Al ataýly kómek alyp otyrǵan kópbalaly otbasylardyń árbir balasyna beriletin járdemaqyny 21 myń teńgege deıin ósirýdi tapsyramyn. Atalǵan kómekti barynsha jeńildetý kerek. Halyq ary-beri shapqylap júrmesin. Sosyn ondaı otbasylardyń tabysyn eseptegende basqa áleýmettik járdemaqylardy sanaýdy alyp tastaý qajet. Áıtpese, sonyń bárin sanaǵanda kópbalaly otbasylar baı azamattar bolyp shyǵa keledi», - dep atap kórsetti N.Nazarbaev.
Prezıdenttiń sezde sóılegen sózin myna jerden oqýǵa bolady.
