Árbir azamat saılaýshylar tiziminen ózi týraly derekterdi tekserýi kerek - ákimdik
NUR-SULTAN. QazAqparat – Nur-Sultan qalasy ákimi apparaty basshysynyń orynbasary Júsip Jumaǵulov saılaýshylar tizimin qurý tártibin túsindirdi, dep habarlaıdy QazAqparat tilshisi.
«Saılaý týraly» Zańǵa sáıkes, saılaýshylardyń tizimin jergilikti atqarýshy organ qurastyrady. Atalǵan tizim ár adamnyń turǵylyqty jeri boıynsha turǵyndardyń memlekettik bazasy negizinde jasalady. Oǵan belsendi saılaý quqyǵy bar: 18 jasqa tolǵan, qabiletti, bas bostandyǵynan aıyrý oryndarynda emes Qazaqstan Respýblıkasynyń azamattary qosylady. Naqtyly saılaý ýchaskesinde azamatty saılaýshylar tizimine engizý úshin onyń osy saılaý ýchaskesiniń aýmaǵynda turǵylyqty jeri boıynsha tirkelý faktisi negiz bolady», - J. Jumaǵulov elorda ákimdiginiń baspasóz ortalyǵyndaǵy brıfıngide.
Onyń aıtýynsha, ýaqytsha tirkeýi bar azamattar olar jergilikti atqarýshy organǵa (JAO) bergen jazbasha ótinishi negizinde ǵana saılaýshylar tizimine engizilýi múmkin.
Eger saılaýshyǵa saılaýdan keminde otyz kún buryn, ıaǵnı 10 jeltoqsannan keshiktirmeı, saılaý kúni óziniń tirkelgen orny boıynsha daýys berýge arnalǵan nysanǵa kelý múmkindiginiń bolmaıtyny belgili bolsa, ol óziniń bolatyn jeri boıynsha JAO-ǵa ózin tıisti saılaýshylar tizimine engizý jóninde jazbasha ótinish berýge quqyly. Bul rette, JAO azamatty tirkelgen jeri boıynsha saılaýshylar tiziminen alyp tastaýdy jáne ony sol azamat daýys beretin ýchaskeniń saılaýshylar tizimine engizýdi uıymdastyrady.
«Árbir azamat saılaýshylar tizimindegi ózi týraly derekterdi tekserýge jáne tizimge engizilmegendigi, durys engizilmegendigi nemese tizimnen shyǵaryp tastalǵandyǵy, sondaı-aq tizimdegi saılaýshy týraly derekterde jańsaq aqparat jiberilgeni úshin shaǵymdanýǵa quqyly», - dep túsindirdi Jumaǵulov.
Budan buryn habarlanǵandaı, Nur-Sultan qalasynda 354 saılaý ýchaskesi bar: 5 aýmaqtyq jáne 349 ýchaskelik.
