Árbir ata-ana dinı saýattylyǵyn arttyrýy qajet - Bas mýftı

ShYMKENT. QazAqparat - Túrkistan qalasynda Qazaqstan musylmandary dinı basqarmasynyń uıymdastyrýymen «Din ýaǵyzdaýshylardyń kózqarasy Hanafı mázhabyna negizdelýi kerek!» atty ǵylymı-tájirıbelik konferentsııa ótti. Jıynǵa qatysqan dinı basqarmanyń tóraǵasy Serikbaı qajy Oraz árbir ata-ananyń dinı saýattylyǵyn arttyrýy qajettigin atap ótti, dep habarlaıdy QazAqparat tilshisi.

Bas múftı baıandamasynda qazaq tarıhynyń qatparlaryna kóz júgirtip, Hanafı mázhabynyń mańyzyn aıshyqtady. Osydan 12 ǵasyr buryn túrkilik tanym men ulttyq tarıhqa musylmandyq joldyń yqpal etýi rýhanı silkinis týdyrǵanyn sóz etti. Sondaı-aq, Serikbaı qajy Oraz jurtshylyqty dúdámal dinı aǵymdardan saqtaý úshin  dinı saýattylyǵyn arttyrýǵa shaqyrdy. Óıtkeni qoǵam men dinniń ara-qatynasyn belgilep alý úshin ata-analar aıanyp qalmaýy qajet. Jastardy jat aǵymnyń jetegine jibermeı, ata dinniń artyqshylyqtaryn aıtyp otyrǵan durys degen Bas mýftı  Elbasy maqalasy da osy maqsatty kózdeıtinin jetkizdi.

Jıynda bas qosqan zııaly qaýym ókilderi qazirgi kezeńdegi ımanı-áleýmettik jutańdyqty boldyrmaýdyń pármendi túri - din ekenin ekshedi. Onyń ǵasyrlar boıy qalyptasqan moraldyq baılyqtarynyń qadir-qasıetiniń máni kún ótken saıyn ósip otyrǵanyn aıtty. Qoǵamdaǵy Islam dini týraly kózqarastyń oń baǵytta ózgerýine teolog mamandardyń úlesi kóp ekenin atap ótti. Konferentsııaǵa qatysýshylar keńestik ıdeologııanyń shekteý sheńberinen shyǵyp, dinı senimderge keń jol ashylǵan demokratııalyq kezeńde halyqqa durys ýaǵyz aıtý - asa mańyzdy degen oı bildirdi. 

Foto: www.muftyat.kz