Arbadaǵy sporttyq bıden úrjarlyqtar 17 medal jeńip aldy

Úrjar memlekettik medıtsınalyq-áleýmettik mekemesinen Baǵlan Manabaev, Álibek Tólegenov, Alekseı Jýravlev jáne olardyń juptary, «Shabyt» bı ujymynyń bıshileri - Darıa Mırnyh, Alena men Anastasııa Krıvohıjınalar qatysyp, 8 altyn, 4 kúmis, 5 qola medalǵa ıe boldy,

«Týrnırge elimizdiń óńirleri men qalalarynan, sondaı-aq, Reseı men Qyrǵyzstannan 60 bıshi kelip, jalpy 11 komanda qatysty. «Balasy atqa shapsa, ákesi úıde taqymyn qysady» demekshi, jarysqa shaqyrý alǵannan keıin búkil mekeme bolyp osy balalardy úlken saparǵa daıyndadyq. Baıqaý tartysty ótti. Bizdiń balalar des bermedi. Bul - baldyrǵandardy bı ónerine baýlyǵan ustaz, joǵarǵy sanatty horeograf Natalıa Anıstratovanyń ólsheýsiz eńbeginiń jemisi», - deıdi top jetekshisi, Úrjar memlekettik medıtsınalyq-áleýmettik mekeme dırektorynyń áleýmettik jumystar jónindegi orynbasary Ryshan Jankúshikova.

Úmitkerler halyqaralyq biliktilik talaptaryna saı combi/duo-standart, latina, freestyle atalymdary boıynsha baq synasqan.

Baıqaýda Alekseı Jýravlev jeke bıleý men Single Freestyle atalymynda eki birdeı altyn júldege ıe bolsa, Baǵlan Manabaev pen Álibek Tólegenov kúmis medaldardy enshiledi.
 

Baǵlan men Darıa sombi/duo-standart atalymynda kúmis medal, al latina atalymynda qola júldege ıe boldy. Sondaı-aq, osy sombi/duo-standart atalymynda Álibek pen Anastasııa úshinshi oryndy aldy. Al, Baǵlan Single Freestyle nomınatsııasynda úshinshi orynnan kórindi. Al shaǵyn toptar arasynda freestyle atalymynda úrjarlyqtar altyn medalǵa ıe bolyp, jeńimpaz atandy. Nátıjesinde úrjarlyqtar 8 altyn, 4 kúmis, 5 qola medal enshiledi.
  

Eske salaıyq, týrnır «Nazarbaev Ýnıversıtetiniń» sport kesheninde ótti.

Aıta keteıik, osyǵan deıin de úrjarlyqtar Sankt-Peterbýrg qalasynda ótken «Qurlyqtar kýbogy» týrnırinde altyn men qola júlde enshilegen bolatyn.