Arbadaǵy bıdi meńgergen úrjarlyq ónerpazdar Sankt-Peterbýrgty baǵyndyrdy
ASTANA. QazAqparat - Reseıdiń Sankt-Peterbýrg qalasynda arbadaǵy bı saıysynan dástúrli «Qurlyqtar kýbogy» aıaqtaldy. 12 eldiń múmkindigi shekteýli ónerpazdary qatysqan halyqaralyq jarysta Qazaqstannyń namysyn qorǵaǵan ónerpazdar jalpy komandalyq esepte úshinshi oryndy ıelendi, dep habarlaıdy «QazAqparat» HAA tilshisi.
Shyǵys Qazaqstan oblysynyń Úrjar aýdanynyń týmalary, qos ónerpaz Baǵlan Manabaev pen Álibek Tólegenov bıyl ǵana Astanada ótken respýblıkalyq deńgeıdegi chempıonattan júldeli oralǵan bolatyn. Sankt-Peterbýrgte 9-10 qyrkúıek aralyǵynda ótken kýbok jarysyna Baǵlan jáne Álibekpen birge, Úrjar aýdandyq áleýmettik-medıtsınalyq ortalyqtyń tárbıelenýshisi 11 jastaǵy Alekseı Jýravlev te barǵan. Baǵlan men Álibektiń osy ýaqytqa deıin de halyqaralyq saıystarda baqtaryn synaǵanyn aıta ketý kerek. Eki jyl buryn Sankt-Peterbýrg qalasyndaǵy on segiz memlekettiń ónerpazdarynyń qatysýymen ótken kýbok jarysynda qos ónerpaz besinshi orynnan kóringen bolatyn. Úrjarlyqtar bul joly kórsetkishin jańartyp otyr.
Sankt-Peterbýrgte ótken «Qurlyqtar kýbogyna» Ázerbaıjan, Belorýsııa, Belgııa, Vengrııa, Italııa, Izraıl, Qazaqstan, Ońtústik Koreıa, Serbııa, Slovakııa men Fınlıandııa elderiniń arbada otyryp bıdi baǵyndyrǵan óner ıeleri jınalǵan.
8 qyrkúıekte sportshylardyń daıyndyǵy saralanyp, bir kúnnen keıin saıys bastalyp ketken. Eki kúndik tartysty kýbok jarysynda 12 eldiń myqtylary eýropalyq, latynamerıalyq jáne ulttyq bıleri boıynsha meńgergen bılerin kórsetken. Bul jolǵy saıystyń ereksheligi - onda 10-16 jas aralyǵyndaǵy jasóspirimder arasynda jeke kýboktyń ótkizilýi.
Atalǵan jarysta Qazaqstan atynan barǵan Alekseı Jýravlev júldeli birinshi oryndy ıelengen. Al buǵan deıin de top jaryp júrgen Baǵlan Manabaev qola medal ıelenip, otandastarymyzdyń jetistigi jalpy esepte «Group Freestyle» nomınatsııasy boıynsha Qazaqstandy úshinshi orynǵa kóterip otyr.
Úrjarlyq ónerpazdardyń arbada otyryp bıdi baǵyndyrýyna muryndyq bolǵan Úrjar áleýmettik-medıtsınalyq mekeme dırektorynyń orynbasary Rysqan Jankúshikovanyń eńbegin erekshe atap ótýge bolady. Jas órenderdi órge súırep júrgen Rysqan Jankúshikova ónerpazdardy sport arbasymen qamtýda demeýshilerdi tartyp, jastardyń ónerin shyńdap keledi.
