«Araı» saıabaǵynda tamaq pen sán festıvali ótedi
ASTANA. QazAqparat - Tamyzdyń 27-si men 28-i kúnderi «Araı» saıabaǵynda saǵat 12-den keshki 20-ǵa deıin Astana food and fashion festival atty tamaq pen sán sharasy ótedi, dep habarlady qalalyq ákimdiktiń baspasóz qyzmetinen.
Festıval QR Konstıtýtsııa kúnine oraılastyrylyp otyr. Kelýshiler erekshe as mázirindegi taǵamdardan dám tatyp, qaladaǵy úzdik dámhanalar men meıramhanalardyń qyzyqty usynystarymen tanysady. Sonymen qatar, festıval qonaqtary otandyq dızaınerlerdiń jańa kollektsııalaryn, qoldan jasalǵan óner týyndylaryn, aksessýarlar men qazirgi zamanǵy qazaqstandyq sýretshilerdiń art-jobalaryn tamashalaıdy.
Saıabaq aýmaǵy birneshe aımaqqa bólinedi. Dástúrli «Shatyr», «Jeruıyq» jáne «Kók bazar» sektsııalarynan basqa, «Astana EKSPO-2017» UK» AQ meıramhanalar men dámhanalarǵa, qazaqstandyq kásipkerler men ShOB ókilderine aqparattyq-tanystyrý sektoryn usynady. Al Pop Up Shop Astana aımaǵynda dızaınerlik kıim, áshekeıler, ınterer zattary men kórkemsýret galereıasy jármeńkesi uıymdastyrylady.
Elordalyq jetekshi aspazshylar durys tamaqtaný boıynsha sheberlik synyptaryn, saıystar ótkizip, dárister oqıdy.
Aıta keteıik, sharaǵa Astana qalasynyń Recommended by EXPO-2017 seriktesteri de qatysady.
Shara barysynda búkil otbasyǵa arnalǵan jármeńke ótkizilip, krossfıtke arnalǵan ashyq alań jasalady. Balalar batýttarda sekirip, akvagrım, kórkemdik plenerler, qolóner stýdııalaryna, túrli oıyndarǵa qatysyp, kóńil kóteredi. Saıabaqtaǵy «Kınoteatr» sektorynda zamanaýı fılmder kórsetiledi, al «Chıllaýt» aımaǵynda qonaqtarǵa ystyq kofe usynylady.
Astana food and fashion festival sharasy qazaqstandyq ónimderdi, brendter men markalardy damytýǵa, otbasylar úshin qaýipsiz demalys uıymdastyrýǵa, halyqty salaýatty ómir saltyn ustanýǵa tartýǵa, sondaı-aq, qala turǵyndaryn aspazdyq pen sán álemindegi jańalyqtarmen tanystyrýǵa baǵyttalǵan. Bıyl merekelik sharaǵa 10 myń adam keledi dep kútilýde.
