Araı Dúısenaeva: Maqsatym - polıtsııa qyzmetinde jemisti eńbek etý
Araı polıtsııa qyzmetkeri bolýdy bala jasynan aldyna maqsat etip qoıdy. Qyzylorda qalasyndaǵy №9 mektep-gımnazııany úzdik bitirgen jas qyz sol armannyń jetegimen 2004 jyly QR Іshki ister mınıstrliginiń Aqtóbe zań kolledjine zańger mamandyǵyna oqýǵa tústi. Al 2010 jyly Qorqyt ata atyndaǵy Qyzylorda memlekettik ýnıversıtetiniń zańger mamandyǵyn támamdady. Eńbek jolyn 2006-2008 jyldarda Qyzylorda qalalyq ishki ister basqarmasynda anyqtaýshy qyzmetinen bastady. Al 2008-2016 jyldarda oblystyq ishki ister departamentinde aǵa anyqtaýshy boldy. 2016 jyldan búgingi kúnge deıin oblystyq polıtsııa departamentinde asa mańyzdy ister jónindegi aǵa anyqtaýshysy qyzmetin abyroıly atqaryp keledi.
«Meniń qyzmetim úlken jaýapkershilikti talap etedi. Árbir usaq-túıekke mán berýimiz tıis. Mundaı dúnıelerdi jiti nazarda ustaýymyz qajet. Sonda ǵana naqty nátıjege qol jetkizemiz. Óz qyzmetimdi jaýapkershilikpen atqarýǵa tyrysamyn», - deıdi Araı.
Araı Dúısenaeva 1988 jyly 18 qańtarda dúnıege kelgen. Onyń áýletinde burynǵy jyldarda da polıtsııa qyzmetinde bolǵan kisiler bar. Atasy Latıf Dıýsenaev 40 jylǵa jýyq ishki ister organdarynda eńbek etti. Al aǵasy Erjan Kýbenov 1998-2015 jyldar aralyǵynda krımınaldy polıtsııa salasynda qylmyspen kúresti, búginde otstavkadaǵy polıtsııa podpolkovnıgi.
Jas bolsa da Araı óz ortasyna syıly. Ol jarqyn da jyly júzimen kópshilikti baýraı túsedi. Otbasynda kórgen tárbıe onyń adamı bolmysyna áser etti. Qaıratty da qajyrly bolýyna septigin tıgizdi. Qyzmet pen otbasynyń berekesin qatar ustap, shańyraǵynyń uıytqysy, adal jar, aıaýly ana Araı qazirgi tańda otaǵasymen birge eki ul tárbıeleýde. Jumysynda salmaqty, er adamdarsha qaıyspas nardaı is tyndyratyn bizdiń keıipkerimiz, oshaq basynda – meıirimdi ana, aıaýly áıel, qurby-qurdasqa – barynsha ashyq ta shynaıy.
Araıdyń qazirgi áskerı sheni - podpolkovnık. Ol qazaq qyzdarynyń óz otbasy men qoǵam tárbıesin qatar ala júrip, sol jolda bıik abyroı-bedelge ıe bolyp otyr.
«Polıtsııa qyzmetinde 15 jyldan beri qyzmet etip kelemin. Bul salada jemisti qyzmet etý - meniń bala kezdegi armanym. Qoǵamdaǵy quqyq buzýshylyqtyń aldyn alyp, beıbit ómirdi qalyptastyrýǵa kúsh-jigerimdi salyp kelemin. Osy tusta atam men aǵamnan alǵan ómirlik daǵdylarym qyzmetimdi abyroımen atqarýǵa septigin tıgizýde», - deıdi Araı Dúısenaeva.