Arapa kúni qandaı amaldar oryndalady?
ASTANA. 14 qazan. QazAqparat - Arapa - dinimizdegi qasıetti kúnderdiń biri. Ol Qurban aıtynan bir kún buryn keledi. Paıǵambarymyzdyń (s.ǵ.s.) bildirýinshe, arapa - artyqshylyǵy mol kún. Ol artyqshylyǵy jaǵynan juma kúnine uqsas. Ol jumadan basqa kúni jasalǵan jetpis qajylyqtan artyq. Duǵalardyń eń jaqsysy da arapa kúni jasalǵan duǵa (Baıhaqı).
Bul kúni Alladan kóbirek keshirim tilep, bilip jáne bilmeı jasaǵan kúná-qatelikterimiz úshin táýbe etýdiń de mańyzy zor. Óıtkeni, áziret Álı: «Alla taǵala dál arapa kúnindegideı esh ýaqytta kóp adamdy tozaq otynan azat etpeıdi», - dep jetkizgeni málim. Keıbir ǵalymdar qasıetti Qurannyń «Yqylas» súresin barynsha kóp, tipti, myń ret oqýdyń artyqshylyǵyn da bildirgen.
Arapa kúni jasalatyn eń izgi isterdiń biri - oraza ustaý. Bul kúni oraza tutý, bir jaǵynan, nápsi tárbıesi úshin mańyzdy bolsa, ekinshi jaǵynan, saýaby da ushan-teńiz. Súıikti Paıǵambarymyz bul týraly bylaı degen: «Arapa kúni oraza tutýshyǵa Adam paıǵambardan Qııamet syrnaıy úrlengenge deıin ómir súrgen búkil adamdar sanynyń eki esesindeı saýap jazylady».
Arapa kúni tań namazynan bastap, Qurban aıtynan keıingi tórtinshi kúni Ekindi namazy bitkenge deıin oqylatyn 23 namazdyń paryzdarynan keıin: «Allahý ákbar, Allahý ákbar. Lá ıláha ıllallah, ýallahý ákbar. Allahý ákbar ýá lılláhı hamd» dep tákbır táshrıq aıtylady. Hanafı mázhaby boıynsha basy azat, turǵylyqty jáne er adamdar úshin bul kúni tákbir táshrıq aıtýdyń úkimi - ýájip.
