Arandatýshy aqparatqa aldanbaı, jurtymyzdyń yntymaǵy men táýelsizdigimizdiń baıandy bolýy jolynda jumyla jumys isteýimiz abzal - Bas múftı, sheıh Ábsattar qajy Derbisáli

Osyǵan baılanysty Qazaqstan musylmandary Dinı basqarmasynyń tóraǵasy, Bas múftı, sheıh Ábsattar qajy Derbisáli jamaǵatqa málimdeme jasady, dep habarlady www.muftyat.kz  saıty.

QazAqparat Bas múftıdiń máldimdemesiniń tolyq mátinin taratady.

* * *

Sońǵy kezderi buqaralyq aqparat quraldarynan «aqyrzaman jaqyndap qalypty», «21 jeltoqsanda dúnıe tirshiligi toqtaıdy eken», «adamdar aqyrzamanǵa daıyndalyp jatyr» degen daýryqpa, eldi dúrliktirer aqparattar berilýde. Zamanaqyrdy qaljyń sózge qosyp, «22-si kúni tiri bolsaq kórermiz» degenderdi de estip qaldyq. Jahanǵa taraǵan «jańalyqty» estip, kórip alǵan keıbir otandastarymyz azyq-túlikterin qamdap jatqan kórinedi...

Bizdiń aıtpaǵymyz: aqyrzamannyń qashan bolatyny jaıly saýaldar paıǵambarymyz Muhammed (s.ǵ.s) zamanynda da adam balasyn mazalaǵan. Alla taǵala «Aǵraf» súresiniń 187-aıatynda: «(Eı, Muhammed!) Olar senen qııamettiń qashan bolatynyn suraıdy. (Sen olarǵa) «Onyń qashan bolatynyn Rabbyńnyń ózi ǵana biledi, ol ony qararly kezinde bolǵyzady. Qııamet - jermen kókke (ondaǵy mahluqatqa) aýyr oqıǵa....» degen.

Jaratýshy Iemizdiń qalaýymen erteli-kesh dúnıe tirshiligi toqtaıtyny ras. Biraq onyń ýaqyt-saǵatyn óziniń dám-tuzy qashan taýsylatynyn bilmeıtin adam balasy qaıdan bilsin?! Ony pende de, perishte de bilmeıdi. Adamzattyń asyly - Alla Elshisine (s.ǵ.s) de maǵlumat berilmegen. Birde Jábireıil (ǵ.s.) perishte paıǵambarymyzǵa (s.ǵ.s) adam beınesinde kelip: «Qııamettiń qashan bolatynyn aıtshy», - deıdi. Sonda ol (s.ǵ.s): «Suralyp turǵan adam surap turǵan adamnan artyq bilmeıdi», - dep jaýap bergen.

Basy ashyq nárse: bári bir Allanyń qolynda. Biz bireýdiń aıtqanyna emes, Qudaıdyń qalaýyna yryq bergen, Onyń ámirine moıynsunǵan musylman halyqpyz. Áldebir taıpanyń tuspaldaǵan tujyrymymen emes, bir Allanyń ámirine amal etken elmiz. Sondyqtan bolar, «Qudaısyz qýraı da synbaıdy» degen maqal musylman qazaqtyń sanasyna sińip, pátýáli sóz urpaqtan-urpaqqa jetip otyrǵan.

Adam tabıǵaty sengish keledi. Qudaıdy tanymaǵannyń «qudaıy» kóbeıedi. Áıtpese, «aqyrzaman taıap qalypty» degen sóz el arasyna 2000 jyly jeldeı esip edi. Keıbir «bilgishter» zamanaqyrdy 2002 jylǵa «aýystyrypty». Onyń da bos daqpyrt ekenine kýá boldyq. Endi, mine, «2012 jyldyń 21 jeltoqsanynda dúnıeniń astań-kesteńi shyǵady» dep eldi dúrliktirip otyr. 

Shyǵys danalyǵynan qalǵan sóz bar: «Meni ólimim emes, ólimnen keıingi ómirim mazalaıdy». Aqyretke daıyndyq dúkennen sirińke, maısham, azyq-túlik satyp alýmen nemese jer qazyp, tereńge tyǵylýmen ólshenbeıdi. Jan azyǵyn emes, ıman azyǵyn jıǵanymyz abzal. Paıǵambarymyzdan (s.ǵ.s) jetken hadıstiń maǵynasy mynaǵan saıady: bul ómirde ólmeıtindeı ómir súrińder, ári aqyretti de umytpańdar.

Nuh (ǵ.s) dáýirinde topan sýdan qashpaq bop, jan saýǵalap taý tóbesine shyqqandar bolǵan. Onda da tiri qalǵan tirshilik ıesi joq. Musylman úshin aqyrzamannyń qashan bolatyny emes, qııamet kúngi esep-qısap mańyzdyraq. Óıtkeni, álginde aıatta aıtylǵandaı, «qııamet - adam úshin aýyr oqıǵa...»

Musylmandardyń ádiletti patshasy bolǵan Omar (r.a) men dana Abaıdyń oı-tujyrymy bir arnada túıisedi: esep bermeı turyp, ózińe esep ber». Ónegeli ómir, ǵıbratty ǵumyr keshý, ımandylyqqa uıysyp, Allanyń aldynda qabyl bolar izgi, unamdy amaldardy atqarý, qysqasy Qudaıǵa qul, adamǵa ul bolý - aqyrettik jemisimiz. Ózime de, ózgege de aıtar nasıhatym osy.    

Men musylmandardy, barsha jurtymyzdy sabyrǵa shaqyra otyryp, bos áńgimege daýryqpaı, odan góri Allaǵa degen senimimizdi nyǵaıtyp, el ıgiligi úshin saýapty da salaýatty izgi isterge úles qosýǵa úndeımin.

Qurmetti otandastar!

Sondyqtan men barshańyzdy bosqa dúrlikkennen góri, Alla taǵaladan eldiń amandyǵyn, halqymyzdyń birligin tileýge shaqyramyn. Arandatýshy aqparatqa aldanbaı, jurtymyzdyń yntymaǵy men táýelsizdigimizdiń baıandy bolýy jolynda jumyla jumys isteýimiz abzal.    

Alla taǵala qulshylyǵymyzdy qabyl etip, eki dúnıeniń baqytyna bólegeı! Barshamyzdy aqyrette júzi jaryq bolǵan quldarynyń qataryna qosqaı!