Arandatýshylyqqa boı bermeıik: Talǵarda mert bolǵan jasóspirimniń ákesi úndeý jasady
QONAEV. KAZINFORM – Talǵarda kisi qolynan qurban bolǵan Sherzat Bolattyń ákesi Qarjaýbaı Nurymov qazaqstandyqtarǵa úndeý jasady.
«Qurmetti qazaq eli! Sizderdiń aldaryńyzda basymdy ıemin. Kóp-kóp rahmet sizderge. Meni qoldap, balam úshin qol ushyn berip jatyrsyzdar. Men Qonaev qalasynyń ishki ister departamentinen keldim. Ol jerde is oń jaǵynan qaralyp jatyr. Bizge advokattar kelip kómektesip jatyr. Marqum bolǵan Saltanattyń aǵasynyń da kómegi bar, ol kisige de alǵysymdy aıtamyn. Ótinishim bar, halqym. Eshqandaı mıtıngige shyqpańyzdar, qantógis bolmasyn. Men bar jerde adamdar shoǵyrlansa, sol sátti meniń dushpandarym paıdalanýy múmkin. Kóterilis jasap, meni aıaqtan shalyp, baýyryma qastandyq jasaýy múmkin. Sol sebepti halqym, ótinip suraımyn, eshqandaı kóterilistiń keregi joq. Men tek zań aıasynda durys, ádil sheshim suraımyn. Artyq eshteńe suramaımyn», — dedi Qarjaýbaı Nurymov.
Ol halyqtan arandatýshylyqqa boı bermeýdi surady.
«Shyny kerek, qandaı da bir aqparattar bolyp jatsa, ózim ǵana bólisemin. Vıdeojazbaǵa, aýdıojazba, fotolarǵa senbeńizder. Aqyly túrde advokat jaldaýǵa týra keledi. Ózim eshkimnen qoryqpaımyn. Ózime jaýap bere alamyn. Biraq otbasymnyń qaýipsizdigi úshin alańdaımyn. Meni bir emes, birneshe ret qorqytty. Alyp ketip jatty. Telefonmen de qorqytty. «Zańgermiz, advokatpyz, birge oqyp edik» dep kelip, aldap, meni dalaǵa shaqyryp alyp, qorqytqany ras. Halqymnan suraıtynym – esh qan tógilmesin. Ashyq sot bolýyn talap etem. Ashyq sot bolsa, oń sheshim bolady. Esh arandatýǵa túspeńizdershi. Analar jylamasyn, balalardyń qany tógilmesin!. Baýyrlarym, jigitter, arandamaıyqshy, aldanyp qalmaıyq. Balam óldi. Endi men basqa balalardyń bolashaǵy jaqsy bolsyn!», – dedi ol.
@zarinasapar_aishasapar RESMI ÚNDEÝ!MUQIıAT TYŃDAŃYZDAR
♬ orıgınalnyı zvýk - Zarına Sapar
Eske salaıyq, 4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz.
Ashýly talǵarlyqtar jasóspirim ólimine baılanysty narazylyqqa shyqty.
Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady.
Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.
Sondaı-aq, quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi.
Almaty oblystyq polıtsııa departamenti bastyǵynyń mindetin atqarýshy Serik Shalqarov beınebaqylaý kameralarynan alynǵan jazbalar zerttelip jatqanyn jetkizdi.
Keıin áleýmettik jelide janjaldyń beınejazbalary joıyldy degen aqparat tarady.
Senator Marat Qojaev jasóspirimniń ólimine qatysty kúdiktilerdiń soty ashyq ótýi kerek dep sanaıdy.
