Aralyq sot isin engizýdegi maqsat - kásipkerlik sýbektilerine daýlardy sheshýdiń demokratııalyq, jedel ári ekonomıkalyq tásilderin usyný - Z.Baımoldına
ASTANA. 27 qyrkúıek. QazAqparat - Aralyq sot isin engizýdegi maqsat - kásipkerlik sýbektilerine daýlardy sheshýdiń demokratııalyq, jedel ári ekonomıkalyq tásilderin usyný.
Bul týraly búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine tóreliktiń jáne aralyq sottyq qyzmetin jetildir máseleleri boıynsha ózgerister men tolyqtyrýlar engizý týraly» Zań jobasyn tanystyrǵan QR Ádilet mınıstriniń orynbasary Záýresh Baımoldına aıtty.
«Aralyq sottar týraly» jáne «Halyqaralyq kommertsııalyq tórelik týraly» zańdar 2004 jyly qabyldanǵan. Osy zańdar 8 jyl boıy qoldanysta bolǵanyna qaramastan atalǵan ınstıtýttardyń keń aýqymdy qoldanylýyna jetkilikti serpin bere almady», - dedi ol.
Vıtse-mınıstrdiń aıtýyna qaraǵanda, búginde 21 ǵasyrda damyǵan memleketterde ekonomıkalyq jáne halyqaralyq quqyqtyq daýlardyń 70-90 paıyzy aralyq sot isin júrgizý aıasynda sheshiledi.
«Qazirgi ýaqyttaǵy Qazaqstandaǵy sot protsesi óziniń uzaqtyǵy men kóp satylyǵymen sıpattalady. Bul bızneske olardyń arasynda týyndaǵan daýlardy jedel sheshýge múmkindik bermeıdi. Sondyqtan mundaı daýlardy tórelik pen aralyq sottar arqyly sheshken jón», - dedi Z.Baımoldına.
