«Araltuz» qyzmetkerge 5 mln teńge moraldyq ótemaqy tóleıdi

QYZYLORDA. KAZINFORM — «Araltuz» AQ qyzmetkerine óndiriste zardap shekkeni úshin 5 mln teńge kóleminde moraldyq ótemaqy tóleý týraly sot sheshimi shyqty. Bul týraly Joǵarǵy sottyń baspasóz qyzmeti habarlady. 

Jábirlenýshi 2013 jyldan beri «Araltuz» AQ-nyń tuz óńdeý tsehynda oraýshy bolyp jumys istep kelgen. 2021 jyly tseh operatory qyzmetine aýystyrylǵan. 2025 jyldyń qańtar aıynda dúken qoımasynda túngi aýysym kezinde júk kótergish tehnıka qaǵyp ketken.

Aýyr jaraqattardyń saldarynan birneshe ota jasalǵan. Zardap shegýshi kórý jáne qozǵalý múmkindiginen aıyrylyp, eńbekke jaramsyz bolyp qalǵan. Qazirgi tańda oǵan turaqty túrde kómek qajet, beti men kózine shuǵyl ota jasalýy tıis.

Ol sotqa talap aryz joldap, moraldyq zııandy óteýdi suraǵan. Talapkerdiń aıtýynsha, oqıǵadan keıin onyń psıhıkalyq jáne fızıkalyq jaǵdaıy nasharlaǵan, eki kishkentaı qyzy bar.

Arnaıy tergeý aktisine sáıkes, jazataıym oqıǵaǵa jumys berýshi tarap 100% kináli dep tanylǵan. Atalǵan fakti boıynsha Qylmystyq kodekstiń 156-baby 2-bóligimen qylmystyq is qozǵalyp, qazirgi tańda sotqa deıingi tergeý amaldary júrgizilip jatyr.

Kompanııa ókilderiniń málimdeýinshe, qaıǵyly jaǵdaı abaısyzdyqtan bolǵan. «Araltuz» tarapynan 850 myń teńge kóleminde materıaldyq kómek kórsetilgen. Sonymen qatar, aldaǵy otaǵa baılanysty barlyq shyǵyndy kompanııa óz moınyna alǵan.

Sot otyrysynda jábirlenýshiniń densaýlyǵyna aýyr zııan kelgeni, psıhıkalyq jáne fızıkalyq zardap shekkeni dáleldendi. Aral aýdandyq sotynyń sheshimimen «Araltuz» AQ zardap shekken áıelge moraldyq zııannyń ótemi retinde 5 mln teńge tóleýge mindetteldi.

Sot sheshimi zańdy kúshine endi.

Aıta ketelik Qyzylordada «Damubala» baǵdarlamasyn alaıaqtyq maqsatta paıdalanǵandar sottalǵan edi.