«Araltuz» Arys turǵyndaryna qarjylaı kómek kórsetti

NUR-SULTAN. QazAqparat – «Araltuz» AQ Arys qalasynyń turǵyndaryna óz qarajaty esebinen bir kúndik jalaqy qorynan materıaldyq kómek kórsetti, dep habarlaıdy QazAqparat.

Sondaı-aq, zaýyttyń 500-den astam qyzmetkeri «Araltuz» AQ basshylyǵynyń bastamasyna qoldaý bildirdi jáne zardap shekken turǵyndaryna kómek kórsetý úshin bir kúndik tabysyn qosymsha qorǵa aýdardy.

«Bizdiń kásiporyn da áleýmettik jaýapkershilikti sezine otyryp, barlyq qazaqstandyqtar úshin qıyn kezeńde otandastarymyzǵa qoldaý kórsetýdi jón sanaıdy», - dedi «Araltuz» AQ prezıdenti A.Taýasarov.

«Araltuz» AQ - Qazaqstandaǵy ónerkásip pen tuz naryǵynda kóshbasshy, sondaı-aq tuz óndiretin TMD-daǵy úsh iri kompanııanyń biri. Qazirgi ýaqytta «Araltuz» AQ ónimderiniń 75 paıyzdan astamy Reseı Federatsııasy, Qyrǵyzstan, Ázirbaıjan jáne Ýkraınaǵa eksporttalady. 2019 jyldyń birinshi toqsanynyń qorytyndysy boıynsha «Araltuz» AQ reseılik as tuzy naryǵynda 18 paıyzdan astam naryq úlesin alady.