«Araltóbe» qorǵanynda ashyq aspan astyndaǵy mýzeı salýǵa 134 mln teńge bólindi

ATYRAÝ. KAZINFORM –  Atyraý oblysy Jylyoı aýdanyndaǵy Araltóbe qorǵanyn ashyq aspan astyndaǵy mýzeıge aınaldyrý úshin qazynadan 134 mıllıon teńge qarastyryldy. 

Jylyoı aýdanyna qarasty Aqkıiztoǵaı aýyldyq okrýgi atalǵan qorǵandy qalpyna keltirip, ashyq aspan astyndaǵy mýzeı salý úshin memleketik satyp alý portalynda konkýrs jarııalady. Ótinishterdi qabyldaý 6 qazanda bastalyp, týra bir aptaǵa sozylady.

Bul jumys ejelgi sarmat dáýiriniń mádenı murasyn saqtaýǵa baǵyttalǵan. Jobalyq-smetalyq qujatta qorǵan ǵımaraty men ekspozıtsııalyq qurylymdar,gıpperealıstik «Altyn adam» músini salynatyndyǵy kórsetilgen.

Atyraý oblystyq mádenıet basqarmasy men Aqkıiztoǵaı aýyldyq okrýginiń arasynda 2022 jyly jasalǵan qorǵaý mindettemesindegi aqparatqa súıensek, eskertkishtiń tehnıkalyq jaı kúıi nashar.

Kezinde qazba jumystary júrgizilgennen keıin konservatsııa jasalmaǵan. Qorǵaý taqtasy osydan 21 jyl buryn ornatylǵan. 

Aıta keteıik, Araltóbe qorǵandary b.z.d. ІІ – І ǵasyrlar aralyǵyna jatatyn jergilikti mańyzy bar tarıh jáne mádenı eskertkishterdiń biri. Ol Atyraý oblysy, Jylyoı aýdany, Qulsary qalasynan shyǵysqa 70 shaqyrym jerde ornalasqan. Araltóbe qorǵandary tobyn 1989 jyly Batys Qazaqstan arheologııalyq ekspedıtsııasy anyqtady. Qorǵanǵa 1999 jyly Á.Marǵulan atyndaǵy arheologııa ınstıtýtynyń jetekshisi Z.Samashev basqarǵan Batys Qazaqstan arheologııalyq ekspedıtsııasy qazba jumysyn júrgizdi. Nátıjesinde Qazaqstan tarıhyndaǵy ekinshi «altyn adam» tabyldy. 

Aıta ketelik Qaraǵandy oblysynda bıyl bes kesene qaıta jańǵyrtylatyny týraly jazǵan edik.