Aralyq qorytyndy: negizgi UBT 139 myń ret tapsyryldy
ASTANA. KAZINFORM – 2026 jyldyń 10 mamyrynda bastalǵan negizgi UBT 139 myńǵa jýyq ret tapsyryldy. Talapkerlerdiń 71%-y testileýdi qazaq tilinde, 29%-y orys tilinde jáne 259 ret aǵylshyn tilinde tapsyrdy.
Úshinshi aptanyń qorytyndysy boıynsha talapkerlerdiń 67%-y shekti ball jınady. Bes pán boıynsha ortasha ball 65 ball boldy. Eń joǵary nátıje – 140 ball, ony Pavlodar oblysynyń túlegi Áset Altaır jınady.
Erekshe bilim berý qajettilikteri (EBQ) bar oqýǵa túsýshiler úshin qolaıly jaǵdaı jasaýǵa erekshe kóńil bólinedi. UBT-ǵa EBQ bar 392 talapker qatysty.
Talapkerlerdiń test tapsyrmalarynyń mazmuny boıynsha testileý aıaqtalǵannan keıin 30 mınýt ishinde apellıatsııaǵa berý quqyǵy bar. Tehnıkalyq sebepter boıynsha apellıatsııa tikeleı testileý kezinde qabyldanady. Nátıjeleri bar sertıfıkattar apellıatsııa qarastyrylǵannan keıin jeke kabınetterde qoljetimdi bolady.
UBT-ny ótkizýdiń úsh aptasynda 283 ereje buzýshylyq anyqtaldy. 168 talapker smartfondardy, smart kózildirikterdi, mıkro qulaqqaptardy, shpargalkalardy jáne basqa da tyıym salynǵan zattardy alyp kirmek bolǵany úshin testileýden shettetildi. Taǵy 115 adam testileý kezinde erejelerdi buzǵany úshin aýdıtorııadan shyǵaryldy, olardyń nátıjeleri joıyldy. Ózge adamdardyń ornyna kirý faktileri anyqtalǵan joq.
2026 jylǵy UBT aıaqtalǵannan keıin kúntizbelik jyldyń 31 qazanyna deıin beınejazbalarǵa taldaý júrgiziledi.
Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda UBT nátıjeleri joıylady.
Esterińizge sala ketsek, 240 myńǵa jýyq talapker testileýge qatysýǵa eki múmkindikti esepke alǵanda 446 myńnan astam ótinish bergen.
Aıta keteıik, Qyzylorda oblysynyń Shıeli aýdanyndaǵy ShoqanÝálıhanov atyndaǵy №127 orta mektep-lıtseıdiń bitirýshi túlekteri, egiz qyzdar Káýsar jáne Gaýhar Altynsary UBT-da joǵary nátıje kórsetip, aımaq mereıin ústem etti.
