Aralǵa Esilden sý burý ańyz ba, naqty joba ma – Sý mınıstrligi jaýap berdi
ASTANA. KAZINFORM – Bolashaqta kóktemgi tasqyn kezeńinde Esil ózeninen Torǵaı ózeni arqyly Aralǵa sý jiberilýi múmkin. Joba qazir zerttelip jatyr. Bul týraly Kazinform saýalyna QR Sý resýrstary jáne ırrıgatsııa mınıstrliginiń resmı jaýabynda aıtyldy.
Sońǵy ýaqytta «Esil ózeniniń tasqyndaryn orta aǵysynda basqarý, aǵynnyń bir bóligin Torǵaı men Aral teńizi basseınine jiberý» jobasyn sý mamandary qyzý talqylap júr.
Jyl basynda onyń ǵylymı jetekshileri — «Qazaq sý sharýashylyǵy ǵylymı-zertteý ınstıtýty» JShS bas ǵylymı qyzmetkeri, tehnıka ǵylymdarynyń doktory Orazhan Qarlyhanov jáne «Kaspıı - Aral basseıniniń ekojúıesin jańǵyrtý jáne sý tasqynyn basqarý» halyqaralyq qorynyń joba úılestirýshisi ári menedjeri Toǵataı Arman Aral aýdany ákimdiginde jobany tanystyrdy.
Jobaǵa saı kóktemgi tasqyn kezeńinde Esil ózeniniń sýyn aldymen Torǵaı ózenine, odan keıin Aral teńizine baǵyttaý kózdeledi. QR Sý resýrstary jáne ırrıgatsııa mınıstrligi bul joba qazir ǵylymı turǵydan zerttelip jatqanyn málim etti.
– Qazaqstan Respýblıkasynyń sý resýrstaryn basqarý júıesin damytýdyń 2024-2030 jyldarǵa arnalǵan tujyrymdamasyn iske asyrý jónindegi is-qımyl josparyna sáıkes sý resýrstaryn paıdalaný tıimdiligin arttyrý maqsatynda sý resýrstaryn, onyń ishinde Ertis ózenin aýmaqtyq qaıta bólýdiń perspektıvalyq nusqalaryn ázirleý boıynsha zertteýler júrgizý kózdelgen. Osy zertteýler júrgizýdiń aıaqtalý merzimi: 2029 jyldyń 4-shi toqsany. Júrgiziletin zertteýlerdiń nátıjesinde ózenderdiń aýmaqtyq qaıta bólýdiń perspektıvalyq nusqalary ázirlenetin bolady. «Esil ózeniniń tasqyndaryn orta aǵysynda basqarý, aǵynnyń bir bóligin Torǵaı men Aral teńizi basseınine jiberý» jobasy da ǵylymı turǵyda zerttelip jatyr. Naqty sheshim sol zertteýlerdiń nátıjesine baılanysty qabyldanady, - delingen jaýapta.
Mamandardyń aıtýynsha, joba júzege asý úshin aldymen kanaldar júıesin, Torǵaı ózeniniń salalarynyń arnalaryn paıdalana otyryp, Qostanaı oblysy Torǵaı aýdanynda «Saryqopa» jáne Aqtóbe oblysy Yrǵyz aýdanynda «Torǵaı» sý qoımasyn salý kerek bolady.
Aıta keteıik, buǵan deıin «Soltústik Araldy saqtaý» jobasynyń ekinshi kezeńinde qandaı jumystar atqarylatynyn jazǵan edik.