Araldyń tartylýyn ekologııalyq apat retinde ǵana qarastyrýǵa bolmaıdy - depýtat

ASTANA. QazAqparat - Parlament Májilisinde bir top depýtattar jáne ártúrli mınıstrlikterdiń ókilderi Aral teńiziniń tartylýy máselesin «jalpydan jekege» qaǵıdaty boıynsha talqylap jatyr, dep habarlaıdy QazAqparat tilshisi.

«Aral óńiriniń ekonomıkalyq, ekologııalyq jáne áleýmettik máselelerin zańnamalyq retteý» taqyryndaǵy dóńgelek ústelde QR Parlamenti Májilisiniń Ekologııa máseleleri jáne tabıǵat paıdalaný komıtetiniń múshesi Gennadıı Shıpovskıh Aral óńirin aralap shyqqan atap ótti. Onyń aıtýynsha, búgingi jıyn Aral teńiziniń tartylý sebebin anyqtap, ekologııalyq apatty aımaqqa aınalǵan óńirdiń jaı-kúıi men osy sý qoımasyn qutqarýǵa qatysty jumystarǵa, sondaı-aq qazirgi tańda oryn alyp problemalardy talqylaýǵa arnalyp otyr.

«Aral ekologııalyq apaty jáne onyń teris áleýmettik-ekonomıkalyq saldary ondaǵan jyldar boıy tek bizdiń eldiń ǵana emes, kórshiles elder men halyqaralyq qaýymdastyqtardyń nazaryndaǵy máselege aınaldy. Osy sharany ótkizýge daıyndyq barysynda qańtar aıynda Qyzylorda oblysynyń Aral aýdanyna arnaıy issaparmen baryp, birneshe eldimekende bolyp, jergilikti problemalarmen tanysyp qaıttym. Osy issapar kezinde Barsakelmes memlekettik-tabıǵı qorynyń ákimshiligimen kezdesip, óńirdiń ekologııalyq problemalaryn talqyladyq», - deıdi depýtat.

Gennadıı Shıpovskıhtiń aıtýyna qaraǵanda, ol Aral qalasy men Sekseýil kentterinde bolyp, «Aral-tuz» kásipornyn, aýdandyq aýrýhana men sport keshenderin aralap shyqqan.

«Aral óńiri ekonomıkasyna Soltústik Araldyń qalpyna keltirilýine baılanysty ózgeristerdiń áser etip otyrǵany sózsiz. Osyǵan qaramastan, sheshimin tappaı otyrǵan problemalar barshylyq. Aral taǵdyry - bul adam taǵdyry. Sol sebepti Aral teńiziniń tartylýyn ekologııalyq apat retinde ǵana qarastyrýǵa bolmaıdy. Bul - keshendi jáne kúrdeli problema. Aral teńiziniń tartylýy jáne múldem joǵalýy elimizdi ǵana tolǵandyryp otyrǵan joq. Bul - Aral teńiziniń basseıninde ornalasqan Ortalyq Azııa elderiniń ortaq máselesi», - deıdi Gennadıı Shıpovskıh.

Májilismen sonymen qatar, atalǵan ekologııalyq apatqa halyqaralyq qaýymdastyqtar da erekshe nazar aýdaryp otyrǵanyn aıtady. Óıtkeni, Aral teńiziniń tartylýy kórshiles elderdiń ekologııasyna, áleýmettik-ekonomıkalyq damýyna keri áserin tıgizip otyr.

«Osy oraıda Aral problemasyn jalpydan jekege qaǵıdaty boıynsha talqylaýdy jón kórdik», - deıdi depýtat.

Aıta ketsek, Májilis qabyrǵasynda ótip jatqan dóńgelek ústelge SІM, Energetıka, Aýyl sharýashylyǵy mınıstrlikteriniń ókilderi qatysýda.

Foto: ruh.kz