Araldyq zerger 30 jyldan beri er-turman jasaýmen aınalysady
QYZYLORDA. QazAqparat - Araldyq belgili qolóner sheberi, zerger Qudaıbergen Qulmambet - ulttyq ónerdiń naǵyz janashyry. Onyń qolynan shyqqan buıymdar búginde elimizdiń kóptegen murajaılarynda saqtaýly. Sonymen birge shetelderge shyǵarylǵan jádigerler de az emes. Ataǵy elimizge keńinen tanymal zerger jaıynda QazAqparat tilshisi tarqatyp aıtady.
Qudaıbergen Taǵjanuly 1954 jyldyń 1 aqpanynda Aral qalasynda dúnıege kelgen. Bir qyzyqty jaıt, ol on segiz qyzdan keıin dúnıe esigen ashypty. Ákesi uıabasar Qudaıbergennen kóp úmit kútken. Ózi de Syr eline belgili ataqty usta bolypty. Otyz jyldan astam ýaqyt boıyna túrli deńgeıdegi kórmelerge qatysqan usta alǵash kórmesin segizinshi synypta oqyp júrgende uıymdastyrǵan eken.
Qudaıbergen - qylqalam sheberi, ári sazdan músin jasaıdy, aǵashtan da oıý oıady. Qoldanbaly ónermen otyz jylǵa jýyq aınalysyp keledi. Onyń qolynan shyqqan alqa, sáýkele, qusmuryn júzik, qapsyrma bilezik, qarsy ilgek shashbaý, tumarsha, syrǵa syndy buıymdar qyz-kelinshekter úshin taptyrmas áshekeıler. Usta súıekpen órnektelgen dombyra, shaqsha, kádesyı retinde qylysh, qanjar da jasaıdy. Qazanatqa er-turman deısiz be, ustanyń qolynan kelmeıtin dúnıe joq.
«Men soǵatyn zergerlik buıymdardyń kópshiligi kúmisten jasalady. Qazaq halqy ejelden-aq kúmiske erekshe mán bergen. Kúmistiń adam aǵzasyna paıdasyn búgingi ǵylym da dáleldep otyr», - deıdi zerger.
Túrli baıqaýlar men konkýrstardyń jeńimpazy atanyp ejelgi ónerdi damytyp, ulttyq sananyń jańǵyrýyna ózindik úles qosyp júrgen zerger-usta «EKSPO-2017» kórmesine de óziniń túrli buıymdaryn usyndy. Kópshiliktiń iltıpatyna bólenip, joǵary baǵa aldy.
«Bul bizdiń ulttyń qanynda bar óner. Biz ony joǵaltyp almaı urpaqtan-urpaqqa tabystaýymyz kerek. Elbasynyń «Rýhanı jańǵyrý» dep otyrǵany da ult jadynyń jańǵyrýy dep bilemin. Ol úshin biz ótkenimizdi dáriptep, keleshekke tanytýǵa mindettimiz. Urpaq sabaqtastyǵy degenimiz sol», - deıdi Qudaıbergen Qulmanbet.
