Araldyq sheber umytylyp bara jatqan alasha toqýmen aınalysady
QAZALY. QazAqparat - Aral aýdany Shómishkól aýylynyń turǵyny Gúlnár Ánápııaeva umyt bolyp bara jatqan toqyma ónerimen aınalysady, dep habarlaıdy QazAqparat tilshisi.
Bilim salasynda 40 jyldaı jumys istegen Gúlnár Júsipqyzy zeınet demalysyna shyqqan soń alasha toqý ónerine shyndap kirisken.
«Alasha toqýdy anam men ájemnen úırendim. Osy iske den qoıǵanda aýyldaǵy apalar qatty qýandy. Ózderiniń bar bilgenderin aıtyp, órmek aǵashtaryn berip, qoldaý kórsetti. Jas qyz-kelinshekter de jip ıirip, jún tútip, boıaý jumystarynda qol kómekterin aıamaýda», - deıdi Gúlnár Júsipqyzy.
Sheberdiń aıtýynsha, alasha toqýdyń shym terý, ara terý, qorasan terý, teris butaq syndy túrleri bar.
«Bul óner asqan yjdaǵattylyqty talap etedi. Qarapaıym kerege tańǵyshty toqý úshin kem degende 2- 3 kún ýaqyt jumsaımyz, basqurdy toqýǵa 1-1,5 aı ketedi», - deıdi ol.
Gúlnár Júsipqyzy alasha toqý isine kirisken shaqtan bastap, sheberligin odan ári shyńdap keledi. Oblys, aýdan kóleminde ótken sheberlik sabaqtaryna qatysyp, óz ónerimen tanylyp júr.
«Oblys boıynsha alasha toqýmen aınalysatyn eki-aq adam bar. Onyń biri - Qarmaqshy aýdanynda tursa, ekinshisi - men. Ótken jyly EKSPO kórmesi aıasynda ótken «Qorqyt jáne Uly dala sazy» atty festıvalge buıymdarymdy apardym. Túrli órnektermen toqylǵan alashalarym kelýshilerdiń erekshe nazaryn aýdartty. Tipti, Shymkent, Aqtóbe, Almaty oblysynan kelgen qonaqtar murajaılarǵa qoıýǵa arnaıy tapsyrys berip, toqytyp aldy. Jan-jaqtan kelgen qolóner sheberleriniń basyn quraǵan bul festıval meniń biliktiligimdi arttyrýyma septigin tıgizdi», - dedi Gúlnár apa.
Qazirgi kúni alasha toqýdan basqa, kıizden túrli kádesyı daıyndaıtyn Gúlnár Júsipqyzynyń ónerine qyzyǵatyndar kóbeıgen. Ásirese, aýyldaǵy jas kelinshekter men oqýshy qyzdar sheberlik sabaǵyn alyp júr. 
