Araldyń qurǵaǵan tabanyna 48,7 mln sekseýil kósheti egildi
ASTANA. KAZINFORM – «Taza Qazaqstan» bastamasy aıasynda memlekettik orman qory aýmaǵynda jalpy 1 mlrd 369 mln kóshet otyrǵyzyldy. Bul týraly QR Ekologııa jáne tabıǵı resýrstar vıtse-mınıstri Mansur Oshýrbaev aıtyp berdi.
– «Taza Qazaqstan» bastamasynyń taǵy bir mańyzdy baǵyty – el aýmaǵyn kógaldandyrý jáne orman alqabyn ulǵaıtý. Osylaısha, memlekettik orman qory aýmaǵynda jalpy 1 mlrd 369 mln kóshet otyrǵyzyldy. Onyń ishinde Aral teńiziniń qurǵaǵan tabanyna 48,7 mln sekseýil kósheti egildi, - dedi M. Oshýrbaev Prezıdent janyndaǵy Ortalyq kommýnıkatsııalar qyzmetinde ótken brıfıngte.
Ótken jyldyń sońynda Qazaly qalasynda 33 gektar aýmaqta jylyna 3 mln kóshet óndirýge áleýetti orman tálimbaǵynyń qurylysy aıaqtaldy.
Qazirgi tańda agrotehnıkalyq talaptarǵa sáıkes, bul tálimbaqta 10 gektar jerge sekseýil tuqymdary sebildi.
− Bıyl Araldyń qurǵaǵan tabanynda 15 gektarlyq tálimbaq jobasy ázirlenip, qudyq qazý jumystary júrgizilip jatyr. Sonymen birge, qyzmetkerlerge arnalǵan óndiristik konteıner-modýlder jetkizildi, - dep tolyqtyrdy Mansur Oshýrbaev.
Buǵan deıin Ekologııa jáne tabıǵı resýrstar mınıstri Erlan Nysanbaev Jibek Joly stýdııasynda suhbat berip, Prezıdenttiń 2 mlrd aǵash egý tapsyrmasyn qalaı oryndap jatqanyn aıtyp berdi.
Eske sala ketsek, «Taza Qazaqstan» aktsııasy aıasynda ótken jyldan beri el boıynsha 1,4 mln tonna qaldyq jınalyp, 2,4 mln aǵash otyrǵyzyldy. Aktsııaǵa shamamen 9 mln adam qatysqan, onyń ishinde 450 myń erikti bar.
Byltyr Telegram-da iske qosylǵan @TazaQazBot turǵyndardyń 22 myń shaǵymyn qabyldady, onyń 21 myńnan astamy oryndaldy.