Araldyń aýyldarynda shegirtke qaptady — AShM jaýap berdi
QYZYLORDA. KAZINFORM - Áleýmettik jelide Qyzylorda oblysy Aral aýdanynyń eldi mekenderinde shegirtke qaptap ketkeni týraly vıdeo tarady.
Instagram áleýmettik jelisiniń Zello Aralsk paraqshasynda jarııalanǵan beınejazbada Aral aýdany Shıjaǵa aýylynyń Qyzeke, Dobal, Aıtjantaban, Kókoshaq sekildi aýmaqtarynda tótenshe ekologııalyq jaǵdaı qalyptasqany keltirilgen.
- Sońǵy birneshe kúnde aýyl mańyndaǵy jaıylymdyq jáne shabyndyq jerlerdi jappaı shegirtke basyp, mal sharýashylyǵyna aıtarlyqtaı zııan keltirdi. Jaqynda júrgizilgen dezınfektsııalyq jumystardan esh nátıje kórmeı otyrmyz.
Sonyń kesirinen tórt túlikke arnalǵan tabıǵı azyq — shóp, jońyshqa men jaıylym oty kúrt azaıyp ketti. Bul jaǵdaı maldyń kúıine, sút ónimdiligine jáne jalpy mal sharýashylyǵynyń turaqtylyǵyna tikeleı áser etip otyr. Aýyl turǵyndary óz kúshimen kúresip kórgen. Biraq jándikke qarsy tıimdi shara qoldaný múmkin bolmaı tur. Biz, aýyl halqy, tıisti organdardan, Aýyl sharýashylyǵy mınıstrliginen, tótenshe jaǵdaılar qyzmetinen shuǵyl kómek kórsetýdi, arnaıy dezınsektsııalyq óńdeý jumysyn júrgizýdi suraımyz, - delingen jazbada.
Osyǵan uqsas jazbany jýrnalıst Gúlmıra Ábiqaı Facebook áleýmettik jelisindegi paraqshasynda jarııalady. Vıdeodan Aral aýdanynyń Qaraqum aýylynda ósimdik zııankesi qaptaǵanyn kórýge bolady.
Qyzylorda oblysynyń soltústik aýdanynda qalyptasqan jaǵdaıǵa baılanysty Aýyl sharýashylyǵy mınıstrligi resmı jaýap berdi. Onda Qyzylorda oblysynda shegirtkege qarsy 10 myń gektardan astam aýyl sharýashylyǵy jeri óńdelgeni, kóktemgi maýsymdyq qorǵaý sharalary aıasynda úıirli shegirtkelerge qarsy belsendi kúres jumysy jalǵasyp jatqany jazylǵan.
- Búgingi kúni óńirde josparlanǵan 17,132 myń gektar aýyl sharýashylyǵy alqabynyń 10,524 myń gektary óńdeldi. Shegirtkege qarsy kúres sharalary Aral aýdanyna qarasty Qaraqum, Sazdy, Aqqum, Qosaman jáne Jińishkequm aýyldyq okrýgteriniń aýmaǵynda júrgizildi. Jumysqa 2 jeńil avıatsııa kemesi, 2 asa jeńil ushaq, 12 jerústi tehnıkasy, 5 dron, arqaǵa asylatyn 45 búrikkish jumyldyryldy. Monıtorıng jumysyna 48 maman tartylǵan. Oblys boıynsha shegirtke zııankesterine qarsy kúres sharalaryn júrgizý úshin boljanǵan jalpy aýmaq — 60,024 myń gektar. Josparlanǵan aýmaqtyń barlyǵy boıynsha merdigerlermen kelisimsharttar jasalǵan, - delingen jaýapta.
Mınıstrliktiń habarlaýynsha, óńirde oblys ákiminiń orynbasary basqaratyn jedel shtab quryldy, osyndaı shtabtar aýdan deńgeıinde de jumys isteıdi. Jergilikti jerlerde monıtorıng júrgizý jáne is-qımyldy úılestirý úshin 279 adam tartylǵan.
- Úıirli shegirtkelerdiń dernásilderin anyqtaý maqsatynda 445,8 myń gektar jerge zertteý júrgizildi. Kúres sharalary agroónerkásiptik keshendegi memlekettik ınspektsııa komıtetiniń baqylaýynda. Egin alqaptarynyń zaqymdaný jaǵdaıy tirkelgen joq. Óńdeý jumysynyń barysyn Aýyl sharýashylyǵy mınıstrliginiń agroónerkásiptik keshendegi memlekettik ınspektsııa komıteti tóraǵasynyń orynbasary Saıat Saqmoldın qadaǵalap otyr.
Al Qyzylorda men Aqtóbe oblystarynyń shekarasyndaǵy jaǵdaı Aýyl sharýashylyǵy vıtse-mınıstri Ermek Kenjehanulynyń baqylaýynda.
Óńirlerde monıtorıng jáne kúres jumystary jalǵasyp jatyr, - delingen vedomstvo habarlamasynda.
Áleýmettik jelidegi turǵyndar shaǵymyna Aral aýdanynyń ákimdigi jaýap berdi.
- 2025 jylǵy sáýir aıynyń sońynda aýdan aýmaǵynda zııankesterdiń (shegirtke) jer betine shyǵýy tirkelip, bul baǵytta belsendi jumys júrgizilip jatyr. 27-28 sáýir kúnderi Qaraqum jáne Sazdy aýyldyq okrýgine qarasty aýmaqta ıtalııalyq prýs dernásilderi anyqtaldy. 2-5 mamyr kúnderi Aqqum, Qosaman, Jińishkequm aýyldyq okrýgterindegi óńirlerde zııankesterdiń belsendiligi baıqaldy. Aýdan boıynsha (Qaraqum, Sazdy, Jińishkequm, Aqqum, Qosaman, Sapaq aýyldyq okrýgteri) erekshe qaýipti zııandy organızmderge qarsy hımııalyq óńdeý jumystary júrgizilip jatyr, - delingen aýdan ákimdiginiń jaýabynda.
Osy kezge deıin 10242 gektar jer óńdelgen.
Máselege oraı oblystyq aýyl sharýashylyǵy basqarmasy da ún qatty. Basqarma atqarylǵan jumysty joǵarydaǵy sarynda baıandaǵan.
- Sonymen qatar Aralqum, Sapaq, Jińishkequm, Bekbaýyl aýyldyq okrýgterine qarasty sharýa qojalyqtary men memlekettik jer qorynda zııankesterden zalaldaný derekteri tirkeldi. Osyǵan baılanysty Sapaq aýyldyq okrýginiń Kóktem eldi mekeninde ornalasqan sharýa qojalyǵynyń jerinde 157 gektar aýmaq arnaıy tehnıkamen óńdeldi. Aýdan boıynsha tirkelgen taǵy bir erekshe jaǵdaı – Qaraqum aýyldyq okrýgindegi Kókasha eldi mekeninde zııankesterdiń turǵyn úıler aýlasyna deıin kirip ketkeni. Bul eldi mekende 4 úı ornalasqan. Qazirgi ýaqytta bul aımaq tolyqtaı baqylaýǵa alynyp, qajetti sharalar atqarylyp jatyr. Qalǵan aýyldyq okrýg ortalyqtarynda zııankesterdiń basyp kirý derekteri tirkelmegen, - delingen basqarma jaýabynda.
Buǵan deıin biz Qyzylorda oblysynda bıyl shegirtkeler jyldaǵydan eki apta erte oıanǵanyn jazǵanbyz.