Araldyq taksı júrgizýshisi sheteldik jolaýshylardan artyq aqy alǵan
QYZYLORDA. KAZINFORM — Qyzylorda oblysynyń Aral aýdanynda jergilikti taksı júrgizýshisi shet el azamattary úshin jol aqysyn negizsiz kótergen.
Keleńsiz jaǵdaı áleýmettik jelilerge júrgizilgen monıtorıng barysynda belgili boldy.
— Polıtsııa qyzmetkerleri taksı júrgizýshisiniń kim ekenin anyqtady. Ol Aral aýdanynyń 50 jastaǵy turǵyny bolyp shyqty.
Taksı júrgizýshisi Qazaqstan Respýblıkasynyń tutynýshylardyń quqyqtaryn qorǵaý týraly zańnamasyn buzý boıynsha jáne tıisti tirkeýsiz kásipkerlik qyzmetpen aınalysqany úshin ákimshilik jaýapkershilikke tartyldy. Sot sheshimimen quqyq buzýshyǵa aıyppul salyndy, — delingen oblystyq polıtsııa departamentiniń habarlamasynda.
Jolaýshylardy tasymaldaý qyzmeti qoldanystaǵy zańnama talaptaryna sáıkes júzege asyrylýy tıis.
— Tıisti tirkeýsiz jáne ruqsatsyz taksı qyzmetimen aınalysýǵa, jolaýshylardan negizsiz joǵary aqy talap etýge jol berilmeıdi. Atalǵan talaptardy buzǵan tulǵalar Qazaqstan Respýblıkasynyń zańnamasyna sáıkes jaýapkershilikke tartylady, — delingen habarlamada.
Buǵan deıin habarlaǵanymyzdaı, Básekelestikti qorǵaý jáne damytý agenttigi inDrive servısine básekelestikti qorǵaý salasyndaǵy zańnamanyń buzylýyna jáne tutynýshylardyń quqyqtarynyń shektelýine ákelýi múmkin áreketterge jol bermeý týraly aldyn ala eskertý joldady.
