Araldar úshin talas Qytaıdaǵy Toyota satylymyn 40 paıyzǵa tómendetti
ASTANA. 6 qazan. QazAqparat - Bıylǵy qyrkúıekte Qytaıda satylǵan Toyota kólikteriniń sany byltyrǵy qyrkúıekpen salystyrǵanda 40 paıyzǵa tómendep ketken.
Reuters-tiń habarlaýynsha, bul Qytaı men Japonııa arasynda týyndaǵan Senkaký araldaryna baılanysty daýdyń áseri.
Toyota-nyń táýelsiz top-menedjeriniń aıtýynsha, 2012 jyldyń qyrkúıeginde Qytaıǵa 50 myńdaı kólik satylypty, al bul kórsetkish byltyrǵy qyrkúıekte 86 myńnan asyp túsken.
Al Toyota-nyń baqtalasy koreılik Hyundai qyrkúıekte Qytaıǵa burynǵydan 15 paıyzǵa kóp kólik satyp, mejeni 84 myńǵa jetkizgen.
Toyota men Nissan-nyń aktsııalary Tokıo bırjasynda 5 qazan kúni shamamen bir jarym paıyzǵa túsken.
Qytaı men Japonııa kópten beri Senkaký/Dıaoıýıdaoıý araldarynyń naqty kimdiki ekenin sheshe almaı keledi. Onda kómirsýtektiń mol qory bar dep esepteledi.
Baǵzy arazdyq 2012 jyldyń jazynda japondyq týrısterdiń araldarǵa qonyp, óz týlaryn ilgennen keıin tipten shıelenisip ketken edi. Al Japonııa úkimeti bul 5 araldyń 3-eýin jeke qojaıynynan satyp aldy. Sondyqtan Qytaıda antıjapondyq narazylyq aktsııalary beleń alyp, Toyota, Nissan jáne Honda sııaqty iri kompanııalar Qytaıdaǵy óndirisin toqtatýǵa májbúr boldy. Toyota Qytaıdaǵy jumysyn qyrkúıektiń sońynda ǵana jandandyrdy.
