Araldan tańerteń shyqqan jolaýshylar keshke Aqtaýǵa jetedi — Nurlybek Nálibaev
ASTANA. KAZINFORM — Premer-mınıstrdiń birinshi orynbasary Nurlybek Nálibaev Aral — Kaspıı avtojoly men Qyzylorda — Aqtóbe baǵytyndaǵy jańa magıstraldardyń qandaı maqsatta salynatynyn, olardyń ereksheligi men iske asý merzimin túsindirdi. Onyń aıtýynsha, iri ınfraqurylymdyq jobalardyń qurylysy 2026–2029 jyldary tolyq aıaqtalýy josparlanǵan.
Úkimette ótken brıfıngte jýrnalıster Memleket basshysy jarııalaǵan Aral — Kaspıı magıstraliniń qurylysy men ózge de jol jobalarynyń júzege asý barysy týraly surady.
Nurlybek Nálibaevtyń aıtýynsha, qazir úsh iri joba — Aral — Kaspıı, Sekseýil — Ulǵaısyn, Ulǵaısyn — Aqtóbe jáne Sekseýil — Qyzylorda baǵyttaryndaǵy jol qurylysy júrip jatyr. Memleket basshysy ótken jyldyń tamyz aıynda atalǵan jobalardy bastaýǵa ruqsat bergen.
— Jaqynda Úkimet basshysynyń tapsyrmasymen osy jobalardyń barlyǵyn aralap, qurylys barysyn kózimmen kórip qaıttym. Qazir ol jaqta qyzý jumys júrip jatyr. 500-den astam tehnıka men 1 myńǵa jýyq adam jumys istep jatyr, — dedi ol.
Vıtse-premer Aral — Kaspıı avtojolynyń basty ereksheligine de toqtaldy. Onyń sózinshe, bul — burynnan bar joldy qaıta jańǵyrtý emes, qumdy dala arqyly eki óńirdi baılanystyratyn jańa baǵyt.
Jol Aral aýdanynyń Sekseýil kentinen bastalyp, Beıneý arqyly Aqtaýǵa deıingi kólik qatynasyn qamtamasyz etedi.
Nátıjesinde Araldan tańerteń shyqqan jolaýshylar keshke Aqtaýǵa jetý múmkindigine ıe bolady.
— Buryn eki óńirdi baılanystyratyn mundaı úlken avtojoldar salynbaǵan. Qoldanystaǵy joldardyń bári derlik burynnan bar baǵyttardy qaıta jańǵyrtý arqyly júzege asyrylyp keledi. Al myna jol qumnyń arasynda, jańa baǵytpen salynyp jatyr. Bul tek eki óńir úshin ǵana emes, Batys Eýropa — Batys Qytaı halyqaralyq kólik dáliziniń boıyndaǵy aýmaqtardy damytýǵa da úlken septigin tıgizedi, — dedi Nurlybek Nálibaev.
Sonymen birge Qyzylorda men Aqtóbe qalalaryn baılanystyratyn taǵy bir iri joba júzege asyrylyp jatyr. Ol Qyzylorda — Sekseýil, Sekseýil — Ulǵaısyn jáne Ulǵaısyn — Aqtóbe ýchaskelerin qamtıdy.
Bul jobanyń jalpy quny 2,2 trln teńgeden asady. Joldyń uzyndyǵy shamamen 1 200 shaqyrym bolady. Qazirdiń ózinde Aqtóbe — Ulǵaısyn baǵytynyń birinshi kezeńindegi 28 shaqyrym jol paıdalanýǵa berilip, kólik qozǵalysy ashylǵan.
Jospar boıynsha, barlyq jol qurylysy 2026–2029 jyldary tolyq aıaqtalyp, paıdalanýǵa berilýi tıis.
Buǵan deıin Nurlybek Nálibaev qarajattyń qaı salalarǵa bólinetinin túsindirdi.
