Araldaǵy tosqaýyl beketteri ázirge jumysyn jalǵastyra beredi
ARAL. QazAqparat - Qyzylorda oblysy Aral aýdanyndaǵy tosqaýyl beketteri ázirge jumysyn jalǵastyra beredi, dep habarlaıdy QazAqparat tilshisi.
Aýdanda koronavırýs juqtyrǵan turǵyndar sany basym. Aýdan ortalyǵy men birqatar eldi mekenderde qaterli indetti juqtyrǵan azamattar bar.
Qyzylorda oblysynyń taýarlar men kórsetiletin qyzmetterdiń sapasy men qaýipsizdigin baqylaý departamentiniń habarlaýynsha, aýdanda atalǵan aýrýǵa shaldyqqan 50 adam tirkelgen. Olardyń 33-i Aral qalasynda turatyn bolsa, 15-i Sekseýil, 3-i Jaqsyqylysh kentiniń turǵyndary. Sondaı-aq, 120-ǵa jýyq adam karantınde jatsa, 150-ge jýyǵy úı jaǵdaıynda baqylaýǵa alynǵan. Aýdannyń bas sanıtarynyń qaýlysyna sáıkes demalys oryndaryna ruqsat joq.
Sondyqtan aýdanda birqatar oryndarda tosqaýyl beketteri áli de jumys jasap tur.
«Atap aıtqanda, Aral qalasynda -3, Sekseýil kenti jáne Qamystybas eldi mekeninde blokpostar qyzmet atqarýda. Bul oryndarda kúnine shamamen 100-150 avtokólik ótedi. Jeke quram kúsheıtilgen tártippen jumys isteýde», - deıdi Aral aýdandyq polıtsııa bóliminiń bastyǵy Ámirjan Ótegenov.
Qazir Qyzylorda oblysynda koronavırýs ınfektsııasyn juqtyrǵan 456 adam tirkelgen .
Onyń ishinde Aralda - 49, Qazalyda - 7, Syrdarııada - 27, Shıelide - 74, Jańaqorǵanda - 51, Qarmaqshyda - 7 jáne Qyzylorda qalasynda - 241 adam. Emdelip shyqqandar sany – 286.
