Aralda jolda qalyp qoıǵan jolaýshylar qutqaryldy
ARAL. QazAqparat - Qyzylorda oblysy Aral aýdanynda qutqarýshylar jolda qalyp qoıǵan jolaýshylarǵa kómek kórsetti, dep habarlaıdy QazAqparat tilshisi.
Aral aýdany №3 mamandandyrylǵan órt sóndirý bóliminiń baılanys beketine jolaýshylardyń jolda qalyp qoıǵany jóninde habar túsken.
Oqıǵa ornyna jedel jetken qutqarýshylar «Mercedes-Benz» markaly jeńil avtokóliginiń «Samara-Shymkent» avtojolynyń 1417 shaqyrymynda jolda qalyp qoıǵanyn anyqtady. Kóliktiń qozǵaltqysh bóligi buzylyp, isten shyqqan.
«Jolaýshylar Atyraý qalasynan Túrkistanǵa baǵyt alǵan. Qutqarýshylardyń kúshimen 2 jolaýshy Qamystybas eldi mekenine jetkizildi. Olar medıtsınalyq kómekti qajet etken joq. Aqaýly avtokólik evakýatormen úılerine qaıtaryldy», - dep málim etti Qyzylorda oblysy Tótenshe jaǵdaılar departamentiniń Órt sóndirý jáne avarııalyq qutqarý qyzmeti.
Buǵan deıin Aralda qalqymaly kópirdiń jyljyp ketýinen jol qatynasy úzilgendigi habarlanǵan bolatyn.
