Aralda úshinshi synyp oqýshysy ǵımaratta bomba bar ekendigin aıtyp jalǵan habar bergen
Bul jóninde Aral aýdandyq № 3 órt sóndirý bólimine uıaly telefonnan habar kelip tústi. Onda áldekim «Ǵımaratta bomba bar» degen aqparatty jetkizgen. Bólim mamandary qońyraý shalýshynyń daýysynan jasóspirim ekenin anyqtaǵan. Oǵan qosa jasóspirimniń uıaly baılanys nomeri belgili bolǵan.
Órt sóndirý qyzmetkerleri ol nomerge keri baılanysqa shyǵýǵa tyrysqan. Degenmen telefondy kótermeýine baılanysty jasóspirimniń turǵylyqty jerin birshama ýaqyt anyqtaý múmkin bolǵan joq. Quqyq qorǵaý organdary buǵan baılanysty tıisti is-sharalardy atqardy.
«Jedel izdestirý sharalaryn júrgizý arqyly «jalǵan terrorızm» týraly habar túsirýshi belgili boldy. Ol Aral qalasynda turatyn 2012 jyly dúnıege kelgen 3 synyp oqýshysy eken. Qazirgi ýaqytta tirkelgen iske baılanysty tekserý jumystary júrgizilýde. QR Qylmystyq kodeksiniń 273-babynda terrorızmniń jańadan jasalyp jatqan áreketi týraly dáleldi jalǵan habarlaý boıynsha taǵaıyndalatyn jaza kórsetilgen», - dedi Qyzylorda oblystyq polıtsııa departamentiniń ekstremızmge qarsy is-qımyl basqarmasy bastyǵynyń orynbasary Qýanysh Orazov.
Sońǵy ret oblys aýmaǵynda jalǵan terrorızm týraly habarlama 2017 jyly tirkelgen. Buǵan deıingi quqyq buzýshylyqtar alkogoldik táýeldigi bar nemese júıke aýrýlarymen arnaıy esepte turatyn eresek azamattar tarapynan jasalǵan.