Aralda túıe súti óńdele bastady

QYZYLORDA. QazAqparat - Qyzylorda oblysy Aral aýdanynda alǵashqy sút qabyldaý beketteri ashyldy, dep habarlaıdy «Habar 24».

40 myńnan astam oısylqara tuqymy bar óńirde túıe sútin tereń óńdep, ony shetelge eksporttaý jobasy júzege asyrylyp jatyr.

Teńiz marjanyn terip jegen jurt «shól kemesi» atanǵan túliktiń san dertke daýa shubatyn buǵan deıin ótkize almaı júretin. Jergilikti bılik ınvestor tartý arqyly agroónim shyǵaratyn zaýyt salýdyń oraıyn tapty. Saýsań sýsyn, jeseń azyq, minseń kólik oısylqara tuqymy teńizden jyraq qonystanǵan Aral jurtyn asyrap otyr desek qatelespeımiz.

Shubat óndirisin jandandyryp, halyqaralyq naryqqa shyǵý tetikteri jiti saralanyp, birneshe ınvestordyń jobasy maquldandy. Almatylyq kásipkerler Aralqum, Sekseýil men Jaqsyqylysh aýyldarynda súttiń lıtrin 800 teńgeden qabyldaýdy bastap ketti. Tipti saýyn ingeni kóp túıekeshterge avtomatty saýý qurylǵysy tegin beriledi.

Kásipkerlikke jasalyp jatqan qoldaýdy tıimdi paıdalanyp, ata kásipti alǵa ozdyrsa, tórt túlikten túser tabys kól-kósir ekenin araldyqtar uǵynsa kerek. Kólem kún saıyn ulǵaıyp keledi. Kóktem shyǵa, táýligine bir jarym tonna sút Almatyǵa jóneltilmek. Óıtkeni qurǵaq sút shyǵaryp, kórshi elderge eksporttaıtyn zaýyt Alataýdyń baýraıynda ornalasqan. Endi ol óndiris oshaǵyn shalǵaıdan osy Aralǵa kóshirý jobasy júzege asyrylady.

«Eń qymbaty túıe súti, keıin eshki men sıyr sútin iske qosý maqsatymyzda bar. Ónimge shetelden kóp suranys bar. Ásirese, Araldyń sútin zerthanalyq zertteý nátıjesinde túıeniń jegen dándi daqyldaryna baılanysty súti qoıý ári kórsetkishteri óte joǵary deńgeıde bolyp tur»,- deıdi kásipker Ǵalym Kápý.