Aralda teńiz ústinde úsh ret úılený toıyn jasaǵan jup turyp jatyr
QYZYLORDA. KAZINFORM – Qyzylorda oblysynyń Aral aýdanynda budan 56 jyl buryn úılený toıyn teńiz ústinde jasaǵan jubaılar turady.
Tamyry Araldan bir sátke de ajyramaǵan Shýdabaı Іlııasov pen Ázıza Amanovanyń toıy tarıhta taspalanyp qaldy. Munyń sebebin Shýdabaı aqsaqal tarqatyp aıtyp berdi.
– Ekeýmiz aýdandyq mádenıet úıiniń joldamasymen 1967 jyly avtoklýbqa kınomehanık bolyp kelgenbiz. Tanystyǵymyz osy jerde bastaldy. Eki-úsh jyl bir-birimizdi tanyp-bilip, aramyzda mahabbat sezimi oıanǵasyn sheshemizdiń batasyn alyp, úılenýdi uıǵardyq. 1969 jyly 10 shilde – Balyqshylar kúninde shańyraq kóterdik. Erteńine aýdandyq partııa, atqarý komıtetteriniń basshylary bizdi izdep jatqanyn estidik. Sóıtsek, rejısser Oraz Ábishev teńiz balyqshylardyń ómiri men erligine arnap «Bir hattyń izimen» atty derekti fılm túsirmekshi eken. Soǵan endi otaý quratyn jastardy izdeı kele tańdaý bizge túsipti. Biraq ekeýmizdiń toıymyz keshe ótip ketken. Sodan ekinshi ret sol fılm úshin qaıtadan jar-jar aıtyp, betashar jasaýǵa týra keldi, - dedi Shýdabaı Іlııasov.
Aral balyqshylarynyń qıyn-qystaý zamanda ashtyqtan zardap shekken Edil aýmaǵynyń turǵyndaryna 14 vagon balyq joldap, mıllıondaǵan adamdy ashtyqtan saqtap qalǵany belgili.
– Bul fılm Lenınniń asharshylyq kezinde Aral balyqshylarynan kómek surap jazǵan haty negizinde túsirilgen edi. Onda sol kezdegi atakásip ıeleriniń salt-dástúrin tolyq kórsetý kerek boldy. Baǵymyzǵa oraı oǵan bizdi de túsirip, ómirimizdegi erekshe kezeń tarıhı sát bolyp máńgilikke qaldy, - dedi Ázıza Amanova.
Eń qyzyǵy, erli-zaıyptylardyń úılený toıy bir emes, teńiz ústinde úsh ret ótken.
– Túsirilimdi aıaqtaǵasyn rejısser bastaǵan top qaıtyp ketken bolatyn. Táýir dúne shyqty ǵoı dep oıladyq. Alaıda arada aı ótpeı qaıtadan Aralǵa keldi. «Ne boldy?» desek, kórkemdik keńes túsirilim tobynyń darbazany kilemmen jappaǵanyn kemshilik dep eseptep, jumysyn qaıtaryp jiberipti. Sonymen aıaqasty kilem izdep jónimizge kettik. Úshinshi ret toı rásimderin ótkizip, solaı shala búlingenimiz bar, - dedi Shýdabaı aqsaqal.
Búginde ekeýi qarttyqqa birge jetip, bes perzentten nemere-jıen súıip, solardyń qyzyǵyn kórip otyr.
Buǵan deıin biz qyzylordalyq erekshe jup Nurmuhamed Ábilqasymov pen Áıgerim Nurlanovanyń qalaı shańyraq kótergenin jazǵanbyz.