Aralda Rámizder alańy ashyldy
QAZALY. QazAqparat - Qyzylorda oblysy Aral aýdanynda Rámizder alańy ashyldy, dep habarlaıdy QazAqparat tilshisi.
Joba quny - 174,670 mln teńge. Jalpy aýmaǵy - 8 myń sharshy metr. «Rámizder alańynda» Memlekettik Eltańba, Memlekettik Gımn jáne bıiktigi 20 metrlik Memlekettik Tý ornalasqan. Jańa nysanda kópshiliktiń demalysy úshin bar jaǵdaı jasalǵan.
Alańnyń ashylý saltanatyna aýdan ákimi Muhtar Orazbaev, oblystyq máslıhattyń hatshysy Naýryzbaı Baıqadamov jáne ózge de qonaqtar qatysty.
«Ótken jyly Aral qalasynan «Rámizder alańyn» salýǵa jáne abattandyrýǵa oblystyq bıýdjetten qarjy bólinip, qurylys jumystary qarqyndy túrde júrgizilgen bolsa, búginde ol óz máresine jetti. Munda, ózderińiz baıqap turǵandaı, Qazaqstan Respýblıkasynyń Memlekettik Rámizderi kórinis tapqan. Atap ótý kerek, bıiktigi 20 metr bolatyn kók baıraq arnaıy Astana qalasynyń 20 jyldyǵyna arnalyp otyr. Osy oraıda, Táýelsizdik pen memleket sımvolyna aınalǵan rámizder alańynyń Elbasynyń tikeleı nazarynda turǵan Aral aýdanynan boı tikteýi - rýhanı jańǵyrýdyń jarqyn qadamdary deýge bolady», - dedi N.Baıqadamov.
Odan ári Rámizder alańyndaǵy kók baıraǵymyz kókke kóterilip, el Ánurany oryndaldy. Munan soń aýdan ónerpazdary ázirlegen kontserttik baǵdarlamalaryn kópshilik nazaryna usynyp, turǵyndar qýanyshyn eseleı tústi.
Sharaǵa kelgen turǵyndar men qala qonaqtary rámizderdiń kórkine erekshe yqylastaryn bildirip, ásem ornatylǵandyǵyna rızashylyqtaryn jetkizdi. Ári jastardyń patrıottyq turǵyda tárbıelenip, otansúıgishtik qasıetti boılaryna sińirýine negiz bolar dúnıe jasalǵandyǵyna, boı sergitip, demalar oryndar qatary kóbeıgendigine qýandy.
