Aralda polıtseı káriz qudyǵyndaǵy sýǵa batqan sábıdi qutqardy
ARAL. QazAqparat - Qyzylorda oblysy Aral aýdanynda turatyn polıtsııa qyzmetkeri Dáýrenbek Janaıbekov káriz qudyǵyna qulaǵan bir jarym jastaǵy sábıdi qutqaryp qaldy, dep habarlaıdy QazAqparat tilshisi.
Sol kúni Dáýrenbek jumysynan kelip úıde tús áletinde demalyp jatqan. Osy bir sátte ol syrttaǵy aıqaı-shýdy estidi. Jalma-jan syrtqa shyǵyp, oqıǵanyń jáı-japsaryna qanyǵyp úlgerdi.
Kórshi úıdiń es bilip qalǵan balasy Damır káriz qudyǵy jaqty nusqady. Dáýrenbek onyń beti ashyq turǵanyn kórdi. Onyń ishinde eki metrdeı tómende sábı las sýǵa túsip ketken eken.
«Las sýǵa túsip ketken sábı biraz esin joǵaltyp alǵan sekildi. Álsiz qoldaryn erbeńdetip qoıady. Ony birden ustap alýǵa múmkindik bolǵan joq. Qudyq ishindegi tymyrsyq aýa da erkin qımyl jasaýǵa múmkindik berer emes. Áıteýir búldirshindi las sýdan shyǵaryp syrtta turǵan adamdarǵa berip úlgerdim», - dedi Dáýrenbek.
Káriz qudyǵy ishindegi aýa ony álsiretip jiberdi. Óziniń odan shyǵýǵa múmkindigi bolǵan joq. Sol jerde esinen tanyp qulap qaldy. Ony syrttaǵy jigitter qudyqtan shyǵaryp aldy. Odan keıin Dáýrenbek aýrýhanada jansaqtaý bóliminde em aldy. Qudyqtaǵy sýdan qutqarylǵan balaǵa da dárigerler medıtsınalyq kómek kórsetti.
