Aralda qansha sý qaldy

NURSULTAN. QazAqparat – QR Ekologııa, geologııa jáne tabıǵı resýrstar vıtse-mınıstri Erlan Nysanbaev Araldyń Qazaqstanǵa tıesili bóliginde qansha sý qalǵanyn aıtty, dep habarlaıdy QazAqparat tilshisi.

Vıtse-mınıstrdiń aıtýyna qaraǵanda, Qazaqstan jyl saıyn Úlken Aralǵa 4,5 mlrd tekshe metr sý quıyp otyr.

«Úlken Araldy qalpyna keltirý qıyndaý. Sebebi, Syr men Ámýdarııa ózeniniń boıynda adamnyń tirligi jyldan-jylǵa ulǵaıýda. Adamdar sany kóbeıip jatyr. Qazaqstannyń Araldy saqtap qalýǵa qosqan úlesi –Kishi Araldy saqtap qalǵany. Kishi Araldy saqtap qalý arqyly qanshama jerdi tuzdanýdan saqtap otyrmyz. Úlken Aral qazirgi kúnde joq deýge de bolady. Azyn-aýlaq qana sýy bar. Biz jylyna Syrdarııa boıynsha 4-4,5 mlrd tekshe metr sýdy Úlken aralǵa tastaımyz. Árıne, ol qańsyǵan Araldyń jumyryna da juqpaıdy. Oǵan kem degende jylyna 20-30 mlrd tekshe metr sý kelip quıylýy kerek. Biraq, adam tirshiligin toqtatýǵa bolmaıdy. Syrdyń boıynda otyrǵan halyq ta, Ońtústik pen Ózbekstan halqy da jyl saıyn kóbeıip keledi. Adamzattyń tirligi tek Aralǵa emes, búkil ǵalamsharǵa áserin tıgizip jatyr», - degen mınıstrlik ókili Araldyń qurǵap qalǵan tabanyna sekseýil egý jalǵasyp jatqanyn atady.

«Qazirgi kúnde Kishi Araldyń ózinde 30 mlrd tekshe metrden astam sý bar. Sý paıda bolǵaly mańaıynda tirshilik te jandandy. Kóktemde bizdiń mınıstrlik Koreıa Respýblıkasynyń Orman sharýashylyǵy qyzmetimen birlesip Aral teńiziniń qurǵaǵan túbin fıtoormanmen melıoratsııalaý boıynsha granttyq jobany iske asyryp, Qyzylorda oblysynda 5,0 myń gektar alqapqa sekseýil ekti», - dedi Erlan Nysanbaev.

Eske salsaq, Eske salsaq, Erlan Nysanbaev brıfıng barysynda brakonerler bir jarym jylda 700-den astam kıikti qyryp salǵanyn aıtqan bolatyn.

Brıfıng barysynda vıtse-mınıstr qoryqshylarǵa oq ótkizbeıtin keýdesheler berilýi múmkin ekenin málim etti.