Aralda qalqymaly kópirdiń jyljyp ketýinen jol qatynasy úzildi
ARAL. QazAqparat - Qyzylorda oblysy Aral aýdany aýmaǵynda Syrdarııa ózeni ústinen ótetin qalqymaly kópirdiń ornynan jyljyp ketý saldarynan úsh eldi mekenge jol qatynasy toqtap qaldy, dep habarlaıdy QazAqparat tilshisi.
Syrdarııa ózeni arqyly Qazaly aýdany aýmaǵynan qalyń sel tosynnan kelgen. Saldarynan Qyzyljar, Han eldi mekenderi tusynda ornalasqan qalqymaly kópirlerdiń shynjyry úzilip ketti. Ol Han aýyly tusynda 600, Qyzyljar tusynda 1500 metrge deıin jyljyp ketti. Saldarynan Amanótkel, Jańaqurylys, Qyzyljar eldi mekenderine jol qatynasy toqtap qaldy.
«Qazirgi tańda Han eldi mekeni tusyndaǵy qalqymaly kópir ornyna qoıylyp Jańaqurylys, Amanótkel eldi mekenderine jol qatynasy ashyldy. Al Qyzyljar eldi mekeni tusyndaǵy qalqymaly kópirdi ornyna qoıýǵa ázirge múmkindik joq. Sebebi, darııa boıynda muz baıqalady. Tótenshe jaǵdaı ýaqytynda qalqymaly kópirlerdiń darııa boıymen aǵyp ketpeýine jáne qaıta qalpyna keltirýge Qyzyljar, Jańaqurylys, Amanótkel eldi mekeniniń turǵyndary jáne okrýg basshylary uıymshyldyqpen atsalysty», - dep málim etti Aral aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy Amantaı Tasqynbaev.
