Aralda Eleý Kósherbaev atyndaǵy murajaı ashyldy
QYZYLORDA. QazAqparat-Aral aýdanyna qarasty Shıjaǵa eldi mekeninde memleket jáne qoǵam qaıratkeri Eleý Kósherbaev atyndaǵy murajaı ashyldy, dep habarlady QazAqparat aýdandyq ákimdikke silteme jasap.
Saltanatty sharaǵa qaıratkerdiń uly - Aıtbaı Eleýuly, Aral aýdany ákiminiń orynbasary Jumagúl Álisheva men E.Kósherbaevtyń kózin kórgen bir top aqsaqal qatysty. Murajaıdyń ashylý rásiminde Aral aýdanynyń qurmetti azamaty Shákirat Dármaǵanbetov Eleý atamyz týraly jyly lebizin bildirip, onyń ulttyq qundylyqtardy, elge tanymal babalar esimin ardaqtaýdaǵy ıgi isteri týraly aıtyp berdi.
Aıta keteıik, murajaıda qaıratkerdiń ómiri men eńbek jolyna arnalǵan 13 ekspozıtsııa bar. Onda E.Kósherbaevtyń ómirimen, eńbekterimen jáne marapattarymen tolyǵyraq tanysýǵa bolady. Sonymen qatar, munda qoǵam qaıratkeriniń ómirinen syr shertetin fotosýretter de qoıylǵan. Al murajaıdyń kireberisine Eleý atamyzdyń bıýst úlgisindegi eskertkishi ornatyldy.
Eske sala keteıik, Eleý Kósherbaev - tórtkúl álemge tanymal Qorqyt ata keshenin turǵyzýǵa uıytqy bolǵan tulǵa. Ol HH ǵasyrdyń 60-70 jyldary Qazaly, Syrdarııa aýdandyq partııa komıtetteriniń ekinshi hatshysy, Tereńózek, Syrdarııa aýdanynyń atqarý komıtetteriniń tóraǵasy, oblystyq atqarý komıteti tóraǵasynyń orynbasary bolǵan. Sonymen qatar, 1975-91 jyldary Qarmaqshy, Qazaly aýdandyq partııa komıtetteriniń birinshi hatshysy qyzmetterin atqarǵan.
Kózi tirisinde Lenın, Oktıabr revolıýtsııasy, úsh márte Eńbek Qyzyl Tý ordenderimen jáne birneshe medaldarmen marapattalǵan. Qaıratkerdiń Qarmaqshy, Qazaly aýdandarynyń ómirinen syr shertetin «Óndiris uıytqysy» jáne «Serpin» atty kitaptary bar.
