Aralda drıft jasaǵan turǵynnyń júrgizýshi kýáligi bolmaı shyqty
QYZYLORDA. KAZINFORM – Qyzylorda oblystyq Polıtsııa departamentiniń jedel basqarý ortalyǵy beınebaqylaý kameralarynyń kómegimen jol qozǵalysy erejelerin óreskel buzǵan júrgizýshini anyqtady.
Oqıǵa Aral aýdanynyń ortalyq alańynda bolǵan.
- Júrgizýshi avtokólikpen qaýipti manevrler jasap, drıft uıymdastyrǵan. Atalǵan áreket jol qozǵalysynyń basqa qatysýshylaryna qaýip tóndirip, qoǵamdyq tártip pen turǵyndardyń tynyshtyǵyn buzǵan. Polıtsııa qyzmetkerleri quqyq buzýshyny jedel túrde anyqtap, ustady. Tekserý barysynda júrgizýshiniń kólik quralyn basqarýǵa quqyǵy bolmaǵany jáne tıisti qujattarynyń joq ekeni belgili boldy. Quqyq buzǵan júrgizýshige qatysty Qazaqstan Respýblıkasy Ákimshilik quqyqbuzýshylyq týraly kodeksiniń birneshe baby boıynsha hattama rásimdeldi. Jınalǵan materıaldar zańdy sheshim qabyldaý úshin sotqa joldandy, - dep habarlady departamentiniń baspasóz qyzmeti.
Tártip saqshylary drıft jasaý, jol qozǵalysy erejelerin elemeý jáne qoǵamdyq oryndarda qaýip tóndiretin áreketter jasaý zań talaptaryn óreskel buzý ekenin eskertti.
Buǵan deıin Almatyda «BMW» avtokóliginiń júrgizýshisi túngi ýaqytta jol erejelerin óreskel buzǵan edi.
