Aralda bokstan belgili kásipkerdi eske alýǵa arnalǵan týrnır bolyp ótti - Qyzylorda oblysy
QYZYLORDA. 17 cáýir. QazAqparat - Qyzylorda oblysy Aral qalasynda bokstan jasóspirimder arasynda belgili kásipker Toǵys Jumashevti eske alýǵa arnalǵan respýblıkalyq týrnır boldy.
Balǵyn bylǵary qolǵap sheberleriniń saıysynda 15 salmaq dárejesi boıynsha 60 medal sarapqa salyndy. Aral aýmaǵy ǵana emes, oblysqa aty jaqsy tanymal bolǵan kásipker budan úsh jyl buryn jol apatynan qaza tapqanǵa deıin 53 jyl ómir súrdi. Osy jasyna deıin ol óz aýdanynyń ekonomıkasy damyp, órkendeýine ózindik úles qosty. Birneshe ret oblystyq jáne aýdandyq máslıhattardyń depýtaty bolyp saılandy. Ómiriniń sońyna deıin «Aralotyn» JShS dırektory bolyp qyzmet atqarǵan Toǵys Mahambetııaruly qaıyrymdylyq sharalaryn kóp jasady. Sondyqtan araldyqtar onyń asqaq rýhyn este qaldyrý maqsatynda tuńǵysh ret uıymdastyrylyp otyrǵan bul týrnırdi qýana qabyldady.
Týrnırge elimizdiń ár qıyrynan 1996-1999 jyldary týǵan 160 jasóspirim qatysty. Saıys qorytyndysynda jalpy komandalyq birinshi oryndy Aral aýdanynyń komandasy jeńip alsa, ekinshi orynǵa Aqtóbe oblysy Embi jáne Hromtaý qalalarynyń quramasy ornalasty. Úshinshi belesti Jambyl oblysy Qarataý qalasynyń jas boksshylary baǵyndyrdy. Jeńimpazdar men júldegerlerge gramotalar men eskertkish syılyqtar tabys etildi.
