Aralda aýdandyq ortalyq aýrýhananyń qurylysy bastaldy
QYZYLORDA. QazAqparat - Keshe Qyzylorda oblysynyń ákimi Qyrymbek Kósherbaev jumys saparymen Aral, Qazaly jáne Qarmaqshy aýdandarynda bolyp, shaǵyn jáne orta kásipkerlikti damytý máseleleri boıynsha aktıv otyrystaryn ótkizdi.
Sonymen qatar, aımaq basshysy Aral qalasynda aýdandyq ortalyq aýrýhananyń irgetasyn qalaýǵa qatysty, dep habarlady QazAqparat HAA tilshisi oblystyq ákimdikke silteme jasap.
Q.Kósherbaev araldyqtardy Naýryz merekesimen jáne jańa densaýlyq saqtaý nysany qurylysynyń bastalýymen quttyqtady.
Qyzylorda oblysy áleýmettik damýdy jan basyna shaqqandaǵy qarjylandyrý kólemi boıynsha respýblıkada aldyńǵy orynda ekendigin atap ótken jón.
Osy kúni Aral, Qazaly, Qarmaqshy aýdandarynda kásipkerlerdiń jáne aýyldyq okrýgter ákimderiniń qatysýymen shaǵyn jáne orta bıznesti damytý jóninde aktıv otyrystary ótti. Onda, ásirese, aýyldyq jerlerde kásipkerlikti damytýdyń jáne kásipkerlerdiń quqyqtaryn qorǵaýdyń ózekti máseleleri talqylandy. 
Mıkro, shaǵyn jáne orta kásipkerliktiń damýy oblys úshin asa mańyzdy, sebebi ol jańa jumys oryndarynyń ashylýyna, jergilikti bıýdjettiń nyǵaıýyna jáne salyq bazasynyń ulǵaıýyna septigin tıgizedi. Aldaǵy ýaqytta engiziletin mindetti áleýmettik medıtsınalyq saqtandyrý júıesi ózin-ózi jumyspen qamtyǵandar men jumyssyzdardyń, jeke kásipkerlerdiń zańdy túrde tirkelýin qajet etedi. Oblys ákimi aýyl halqyn bıznestiń negizin úıretetin «Bıznes-Bastaý» jáne «Bıznes-Keńesshi» baǵdarlamalaryna meılinshe kóptep tartýdy, kásipkerliktiń túrli baǵyttary boıynsha jańa jobalar ázirleýdi tapsyrdy.
21 naýryzda shaǵyn jáne orta bıznesti damytý máselelerine arnalǵan otyrystar oblystyń Jalaǵash jáne Syrdarııa aýdandarynda da ótedi.
