Aralda aýdandyq aýrýhana men mektep-lıtseıi ashyldy
QAZALY. QazAqparat - Aral aýdanyda 150 oryndyq ortalyq aýrýhana men 300 orynǵa arnalǵan mektep-lıtseıi paıdalanýǵa berildi. Nysandardyń ashylý saltanatyna Qyzylorda oblysynyń ákimi Qyrymbek Kósherbaev qatysty, dep habarlaıdy QazAqparat tilshisi.
Oblys ákimi aýrýhana ujymyn jańa nysannyń ashylýymen quttyqtady.
«Qazirgi tańda Elbasy tapsyrmasymen memlekettik-jekemenshik áriptestik aıasynda memleket pen jeke sektor arasynda uzaq merzimdi yntymaqtastyqty qalyptastyrýǵa baǵyttalǵan jumystar júrip jatyr. Oblys boıynsha bilim, densaýlyq, sport, jalpy áleýmettik salalar boıynsha 52 nysannyń jobasy ázirlenip jatyr. Ótken jyly Qazaly temirjol aýrýhanasynyń bazasynda Aral, Qazaly, Qarmaqshy aýdandarynyń turǵyndary úshin aýdanaralyq ınsýlt ortalyǵy, Baıqońyr qalasynan kópsalaly aýrýhana ashyldy. Qajetti mamandardy rezıdentýraǵa daıyndaý maqsatynda oblys ákiminiń grantyn bóldik, qazir 22 maman oqyp jatyr», - dedi aımaq basshysy.
150 oryndyq jańa aýrýhananyń ǵımaraty 3 qabat, 4 bloktan turady. Onyń ishinde terapııa, hırýrgııa, travmatologııa, pedıatrııa, gınekologııa, ınfektsııalyq jáne dermatovenerologııalyq bólimsheler qyzmet kórsetedi.
Sondaı-aq, búgin aýdan ortalyǵynda №14 mektep-lıtseıiniń ashylý rásimi ótti. Munda dárishanalardan basqa ashana, akt zaly, kitaphana, sport zaly jáne mektep aýlasynda sport alańy bar. Sonymen qatar, robototehnıka kabıneti, voleıbol sektsııasy jáne sheberhana jumys isteıdi.
«Deni saý jáne bilimdi, básekege qabiletti urpaǵymyzben órkenıetti 30 eldiń qataryna kirýge tolyq múmkindigimiz bolady. Mekteptiń jańa ǵımaraty pedagogıkalyq ujymǵa bilim berý júıesiniń aldynda turǵan mindetterdi sheshýge kómektesedi dep senemin. Al mindetter óte aýqymdy. Bul - adam kapıtalyn damytý. Sarapshylardyń baǵalaýy boıynsha, Batys Eýropa elderinde adam kapıtalynyń jalpy ishki ónimdi qalyptastyrýǵa qosqan úlesi 30%, AQSh-ta 40%, TMD elderinde ol 10-15%-dy quraıdy. Búginde áleýmettik-ekonomıkalyq damýdyń sapalyq sıpattamalary alǵa shyǵýda», - dep atap ótti oblys ákimi mektep-lıtseıdiń ashylý saltanatynda.
Atap óteıik, ótken jyly Aral aýdanynda apattyq mektepterdiń ornyna 6 jańa bilim uıasy salynǵan bolatyn. Oblysta sońǵy 5 jylda 45 bilim oshaǵy, onyń 37-si apattyq mekteptiń ornyna salyndy.
Budan bólek, búgin oblys ákimi Araldaǵy apatty úılerdiń ornyna berilgen 27 jeke úıdiń turǵyndarymen kezdesti. Turǵyndar aımaq basshysyna tez arada turǵyn úı máselesin sheship bergeni úshin alǵystaryn bildirdi.
Eske sala keteıik, aǵymdaǵy jyldyń naýryz aıynda oblys ákimi turǵyndarmen kezdesip, ekiqabatty apatty úıleriniń ornyna jańa turǵynúıler salynatynyn aıtqan edi. Joǵaryda atalǵan otbasylar qyrkúıek aıynda jańa baspanaǵa ıe boldy. Ár úıdiń aýmaǵy 60 sharshy metr jáne turmystyq qajettilikterine arnalǵan qosalqy ýchaskeleri bar. Barlyǵyna jaryq júrgizilip, sý tartylǵan. Sondaı-aq, merdiger kompanııa óz qarjysy esebinen tabıǵı gaz júrgizip, kógildir otynmen jylytatyn pesh ornatyp, jerseriktik televızııasyna qosyp berdi.
