Aralda apattyq úıdegi 27 otbasy jańa úılerge kóshti
QYZYLORDA. QazAqparat - Qyzylorda oblysy Aral aýdanynda apatty úılerde turyp kelgen 27 otbasy jekemenshik úılerge qonystandy, dep habarlaıdy QazAqparat tilshisi.
Eske salaıyq, bıyl 17 naýryzda Aral qalasyndaǵy Taıyr Jarokov kóshesinde ornalasqan eki qabatty turǵyn úıde (19 páterli) tótenshe jaǵdaı oryn alǵan edi. Kelesi kúni Qyzylorda oblysynyń ákimi Qyrymbek Kósherbaev aýdanǵa arnaıy baryp, úı turǵyndarmen kezdesti. Oblys ákimi zardap shekken baspananyń ornyna kóppáterli emes, jekemenshik jańa úıler salynatynyn aıtty.
Sondaı-aq, Aral qalasynda Araltuz kóshesindegi eki qabatty turǵyn úı de (8 páterli) dál osyndaı jaǵdaıdy bastan keship turǵan edi. Mundaǵy otbasylarǵa da jańa baspana salyndy. Osylaısha, Aral aýdanyndaǵy apatty úıler máselesi tolyq sheshimin tapty.
Aımaq basshysynyń baspasóz qyzmetinen málim etkendeı, oblys ákiminiń orynbasary Rýslan Rústemov 27 otbasyǵa jańa úılerdiń kiltterin tabystady.
«Elbasy N.Á.Nazarbaev óz sózinde memlekettik saıasattyń basty maqsattarynyń biri árbir qazaqstandyq otbasyny jeke pátermen nemese jekemenshik úımen qamtamasyz etý ekendigin atap ótken bolatyn. Aımaq basshysynyń jedel áreketiniń nátıjesinde oblystyq bıýdjetten 310 mln teńge qarjy bólinip, 27 turǵyn úıdiń qurylysy júrgizildi», - dedi Rýslan Rústemov.
Jańa qonysqa ıe bolǵan turǵyndardy Aral aýdanynyń qurmetti azamaty Bıǵalı Qaıýpov ta quttyqtady. Jańa úıdiń kiltin alǵan Orazkúl Lashynova aımaq basshylyǵyna máseleni qysqa ýaqytta sheship bergeni úshin alǵys aıtty.
Aıta keteıik, 27 jekemenshik úı Kishi Aral kóshesinde boı kóterdi. Olardyń mańynda Á.Nurpeıisovtiń shyǵarmashylyq úıi, Memlekettik rámizder alleıasy, balalarǵa arnalǵan oıyn jáne sport alańdary ornalasqan. Ár úıdiń aýmaǵy 60 sharshy metr jáne turmystyq qajettilikterine arnalǵan qosalqy ýchaskeleri bar. Barlyǵyna jaryq pen sý tartylǵan. Sondaı-aq merdiger kompanııa óz qarjysy esebinen tabıǵı gaz júrgizip, kógildir otynmen jylytatyn pesh ornatty.
