Aralas jekpe-jek: Sharshy alańda «Arlan» men «Qara jolbarys» alysady
ASTANA. 29 naýryz. QazAqparat - 31 naýryz kúni Almatyda aralas jekpe-jekten matchtyq kezdesý ótedi.
Onda «Alash Pride» klýbynyń kúrzi judyryq jigitteri Grýzııa, Ázerbaıjan, Túrkııa, Ýkraına, Sheshenstan, Reseı jáne Daǵystannyń sportshylaryna qarsy shyǵady. Keshtiń basty jekpe-jegi «Arlan» laqap atymen tanymal sportshymyz Erjan Estanov pen taıaýda ǵana sharshy alańǵa oralǵan «Qara jolbarys» Rasýl Mırzoev arasynda ótpek. Olar álem chempıony ataǵy úshin MMA aralas jekpe-jeginde baq synaıtyn bolady.
Sporttyq saıysty «El arna» telearnasynyń tikeleı efırinen saǵat 23:20-da kóre alasyzdar.
«Biz qazaqstandyq sportshylar qatysatyn sporttyq týrnırlerdi translıatsııalaýǵa turaqty basymdyq berip otyramyz. Álem chempıony ataǵy úshin aralas jekpe-jekti kórermenge taratatyndyǵymyzǵa qýanyshtymyz. Bul biz ishin teleefırdegi eksperıment bolmaq. Degenmen, kelesi qyrynan alyp qaraǵanda, bizdiń elimizde jekpe-jek erekshe tanymaldyqqa ıe ári mundaı translıatsııa kórermenge qyzyqty», - dedi «Habar» agenttigi» AQ-nyń sporttyq translıatsııalar prodıýseri Ashat Jaqaev.
Aıta keteıik, Erjan Estanov elimizdiń jdıý-djıtsýdan, jaýyngerlik sambodan, jekpe-jekten sport sheberi. ISCP nusqasy boıynsha kásibı pankratıonnan álem chempıony, MMA boıynsha NOFC Gran-Prı týrnıriniń jeńimpazy.
Al Rasýl Mırzoev jaýyngerlik sambodan álem chempıony, MMA boıynsha Reseı chempıony, Fight Nights nusqasynda MMA boıynsha álem chempıony.
