ARALAS JEKPE-JEK: Rasýlǵa ketken esemdi qaıtaramyn - Erjan Estanov
ALMATY. QazAqparat- Almatyda aldaǵy 23 qarasha kúni aralas jekpe-jekten ótetin «Dala batyrlary» Halyqaralyq týrnırinde Erjan (laqap aty «Arlan») Estanov pen daǵystandyq Rásúl (laqap aty «Qara jolbarys») Myrzaev arasynda kópten kútken qarymta kezdesý ótedi. Bul týraly búgin Almatyda ótken baspasóz máslıhatynda «Alash Pride KZ» kásibı jekpe-jek klýbynyń bas bapkeri Ashat Erbolatov málimdedi.
Onyń aıtýynsha, eki jigit te bul saıysqa daıyn.
«Ózderińiz bilesizder alǵashqy kezdesý budan 2 jyl buryn ótkizilip, Rásúl Myrzaev jeńiske jetken bolatyn. Endi mine, kópten kútken qarymta match ótkiziledi. Bul týraly talaı ret jazyldy da. Ótken joly Rásúl jattyǵýda jaraqat alyp qalýyna baılanysty kele almady. Muny rastaý úshin ol bizge arnaıy beınebaıan da jibergen bolatyn. Endi mine, Rásúl qasymyzda. Saıys týraly aıtatyn bolsaq, bir jekpe-jekte jeńilis keıde kezdeısoq bolýy múmkin. Alaıda bir qarsylaspen eki kezdesý ótkizip, ekeýinde de jeńilis tapsań.., demek bul jerde bir sportshynyń deńgeıi ekinshisinen joǵary degen sóz. Muny moıyndaý kerek. Al eger Erjan jeńiske jetip, esep 1: 1 bolsa, onda saıystar odan ári jalǵasýy da yqtımal. Bıylǵy týrnırdiń buǵan deıngi biz ótkizgen týrnırlerden aıyrmashylyǵy sol, buǵan aralas jekpe-jek óneriniń kileń myqtylary jınaldy. «Alash Pride KZ» kásibı jekpe-jek klýby qurylǵaly beri sońǵy 4 jyl ishinde talaı jarystar ótkizdik. Aıtarlyqtaı jetistikterge qol jetkizdik. Endi mine, tuńǵysh ret, osy týrnır aıasynda Alash Pride FC» nusqasy boıynsha úsh salmaq kategorııasynda Álem chempıony ataǵy úshin úsh belbeý sarapqa salynady» - dedi A. Erbolatov.
Óz kezeginde Rásúl Myrzaev bul saıysqa tyńǵylyqty daıyndyqpen kelgendigin jetkizdi.
«Búgin ǵana keldim. Áli durystap demalǵanym joq. Onyń ústine osynyń aldynda kishkene syrqattanyp qalyp edim. Degenmen, qazir ózimdi jaqsy sezinemin. Buǵan deıingi jekpe-jekti osy ótken qazan aıynda ótkizgen bolatynmyn..Onda jeńiske jettim. Bul saıysqa da daıynmyn. Esep 1:1 bolmaıdy! Men jeńiske jetip, osy teke-tireske núktesin qoıamyn» - dedi R. Myrzaev.
Óz kezeginde Erjan Estanov ta qarap qalmaıtynyn, jeńis úshin baryn salatyndyǵyn jetkizdi.
«Ketken esemdi qudaı qalsa qaıtaramyn! Barlyǵy oıdaǵydaı bolady. Qazaqtyń rýhyn asqaqtatamyn degen úmittemin. Qudaı qalasa, esep 1: 1 bolady. Bolady dep nyq senimmen aıta alamyn!» - dedi Erjan Estanov.
Sonymen, qos saıysker týrnırde 11-shi jupty qurady.
65 keli salmaq kategorııasy. №11jup. Qarymta aıqas:
Erjan «Arlan» Estanov
Qazaqstan, Almaty qalasy, «Alash Pride KZ» komandasynyń múshesi
Týyp ósken jeri: Ońtústik Qazaqstan oblysy, Saryaǵash aýdany
Ulty: qazaq
Jasy: 29-da
Salmaǵy: 65 keli
Boıy: 174 santımetr
Saıystyq kórsetkishi: 14-4-1
Ataqtary: Pankratıonnan «ISCP» nusqasy boıynsha Álem chempıony, Aralas jekpe-jek boıynsha «NOFC» Halyqaralyq tórttik Gran-prı-diń chempıony, (Reseı, Pskov) q. 2011 jyl, Aralas jekpe-jek boıynsha "Alash Pride FC» Halyqaralyq týrnıriniń eki dúrkin chempıony, (2010-2013 jj.), Aralas jekpe-jek boıynsha «Alash Pride FC» «II Uly Maıdan» Halyqaralyq týrnıriniń jeńimpazy, (2013 j.), Aralas jekpe-jek boıynsha «Alash Pride FC» «Bahadúr» Halyqaralyq týrnıriniń jeńimpazy (2014 j.).
Rásúl «Qara jolbarys» Myrzaev
Reseı, Daǵystan, «Fight Nights» komandasynyń múshesi
Týyp ósken jeri: Kızlıar qalasy
Ulty: avar
Jasy: 28-de
Salmaǵy: 65 keli
Boıy: 174 santımetr
Saıystyq kórsetkishi: 8 -0-0
Ataqtary: Jaýyngerlik sambo boıynsha halyqaralyq dárejedegi sport sheberi, Jaýyngerlik sambo boıynsha Álem chempıony, Pankratıon boıynsha Álem Kýbogynyń ıegeri, Aralas jekpe-jekten «Fight Nights» nusqasy boıynsha Álem chempıony, Aralas jpkpe-jek boıynsha «Alash Pride FC» «1 Uly maıdan» Halyqaralyq týrnıriniń jeńimpazy (2013 j.), Aralas jekpe-jekten «Dare» nusqasy boıynsha Halyqaralyq týrnırdiń jeńimpazy (Taıland, 2013 j.)
Aıta ketelik, erteń 22 qarasha kúni kúndizgi saǵat 12:00-de «MEGA Almaty» saýda oıyn-saýyq kesheninde aldaǵy bolatyn týrnır aldynda saıyskerlerdiń salmaǵyn ólsheý jáne kózqaras «jekpe-jegi» ótedi.
Aldaǵy bolatyn týrnırge barlaǵy 12 jup qatysady.
