Aralas jekpe-jek: Orynborlyq qazaq jigiti taǵy bir brazılııalyqty sabap tastady
ASTANA. QazAqparat - Máskeý qalasynda aralas jekpe-jekten M-1 Challenge 85 týrnırinde reseılik qazaq jigiti, orynborlyq Damır Ismaǵulov jeńil salmaqta brazılııalyq qarsylasy Rojerıo Matıas da Konseısaony úsh raýnd boıy soqqynyń astyna alyp, aıqyn basymdylyqpen jeńiske jetti, dep habarlaıdy «QazAqparat» tilshisi.
«Match TV» telearnasynan tikeleı efırde kórsetkenindeı, osy jekpe-jekke jaqsy daıyndalǵan 26 jasar Damır 31 jastaǵy qarsylasynan myqty ekendigin tanytty. Sóıtip ol tóreshilerdiń biraýyz sheshimimen kásipqoı jekpe-jektegi 13-inshi jeńisine qol jetkizdi. Al osyǵan deıin 13 jekpe-jek ótkizgen brazılııalyq sportshynyń bul úshinshi jeńilisi edi.
Jekpe-jek sońyndaǵy suhbatynda Damır Ismaǵulov óziniń urysyna ákesiniń tuńǵysh ret arnaıy kelip, tamashalaǵandyǵyn aıtyp, jeńisin otbasyna arnaıtynyn, barlyq qoldaýshylaryna, sonyń ishinde qazaqstandyq aǵaıyn-baýyrlaryna alǵysyn jetkizdi.
Aıta keteıik, bıylǵy 26 mamyrda Orynborda ótken M-1 Challenge 78 týrnırinde D.Ismaǵulov jeńil salmaqta taǵy bir reseılik Maksım Dıvnıchti utyp, jeńimpaz atanǵan bolatyn. Sol jeńisinen keıin Damır: «Eger 60-aq aýlasy bar, ǵalamtory joq aýyldan shyqqan qarapaıym jigit M-1 boıynsha álem chempıony belbeýin jeńip alsa, onda bul sizderdiń de qoldaryńyzdan keledi. Bizdiń bul ortaq jeńisimiz jas urpaq úshin úlgi bolsyn», - degen edi.
